Azərbaycan Minifutbol Federasiyasının təşkilatçılığı ilə Bakıda keçiriləcək dünya çempionatına həsr olunan “Legends Cup”da “Neftçi 2000-lər”lə görüşdə “Premyer-liqa məşqçiləri”nin heyətində meydana çıxan Qurban Qurbanov təəssüratlarını bölüşüb.

"Football-plus.az" xəbər verir ki, “Qarabağ”ın baş məşqçisi jurnalistlərə açıqlamasında oyunun maraqlı keçdiyini bildirib.

- Çoxdandı belə bir şəraitdə, bu cür atmosferdə oynamamışdım. Düzdü, bir qədər ağır idi. Çünki formamızdan uzağıq. Bununla belə, futbolçuların ustalığını gördük. Çoxdan görmədiyim veteranları gördüm, zarafatlaşdıq, keçmiş günləri xatırladıq. Hamı üçün maraqlı oyun oldu.

- “Qarabağ”ın baş məşqçisi olsa da, Qurban Qurbanov da “Neftçi”nin 2000-lərdəki əfsanələrindəndi. Görəsən, təcrübəli mütəxəssis “Premyer-liqa məşqçiləri”nin deyil, “Neftçi 2000-lər”in heyətində oynamaq istəyərdimi?
- Mən “Neftçi”də oynamaq istəyərdim. Bəlkə də hər hissə bir komandanın formasını geymək olardı. Lakin sistem belə qurulmuşdu. Bizim komandanın heyəti premyer-liqa klublarının məşqçilərindən formalaşmışdı. Ümumi götürdükdə, ciddi fərqi yoxdu. Hamımız Azərbaycan Minifutbol Federasiyasına, Orxan Məmmədova dəstək üçün gəlmişik. Hər şey super alındı.