Sevgilim, sən maral kimi
Süzməyi kimdən öyrəndin?
Öz əlinlə bənövşəni
Üzməyi kimdən öyrəndin? (Aşıq mahnısı)

Heç nə səbəbsiz olmur. Elə mənim bu məşhur aşıq mahnısının misralarını xatırlamağım, sonra da onları yazıma sərlöhvə etməyim də səbəbsiz deyil.

Bu yaxınlarda “Neftçi”nin sabiq kapitanı Emin Mahmudovun Samir Abasov barədə ötən ilin oktyabrında dedikləri barədə qeydlər etmişdim. Samir Abasov “Neftçi”nin baş məşqçisi postunda Roman Qriqorçuku əvəzləmiş və dərhal da “ağ-qaralar” “Səbail” üzərində qələbə qazanmışdı. Oyundan sonra jurnalistlər kefi kök olan Mahmudovdan Abasovun “Neftçi”yə təyinatının düz addım olub-olmadığını soruşmuşdular. O da cavabında “Samir Abasovun gəlişi həmişə doğru addımdı” demişdi.

Zaman göstərdi ki, heç də düzgün addım deyilmiş. Samir Abasov faktiki “Neftçi”ni böhrandan çıxara bilmədi. Avrokuboklara qatılmaq üçün qısa yol sayılan ölkə kubokunda uğursuzluqla üzləşən paytaxt klubu premyer-liqada da üzləri güldürmədi. Hazırda 40 xalla 6-cı olan “Neftçi”nin mövsümün sonunda 5-ci pillədən yuxarı qalxa bilməyəcəyi dəqiqdi. Özü də bütün bunlar onun fonunda baş verir ki, 4-cü pillədəki “Turan Tovuz” üçün belə mövsüm uğursuz keçib. Qərb təmsilçisi 34 tur ərzində cəmi 12 qələbə qazanıb, 9 oyunda meydandan xalsız ayrılıb. Amma yenə də Tovuz təmsilçisi “Neftçi” üçün əlçatmazdı. Di gəl ki, oktyabrda Samir Abasovun “Neftçi”yə gəlişini uğurlu addım kimi qiymətləndirənlər vardı, ona xilaskar gözüylə baxırdılar. O cümlədən də Emin Mahmudov belə düşünürdü.

Heç şübhəsiz, Mahmudov bu sözləri yeni baş məşqçiyə xoş gəlmək üçün dilə gətirmişdi. İnsafən, heç də pis alınmadı. Komandanın liderlərindən sayılan, yerli futbolçular arasında ən yüksəködənişlilərdən olan Emin faktiki mövsümü yola verməklə məşğul oldu. Çətin məqamlarda onu meydanda görmədik, zədəli olduğu deyildi. Türkün sözü, salladı başı, aldı maaşı. Heç Samir Abasov da bu durumdan narazılığını dilə gətirmədi. Deyəsən, Emin Mahmudov Abasovun həyat və yaradıcılığı yaxından öyrənir, onun bəzi hərəkətlərini təkrarlamağa çalışır. Bir halda ki, Samir bəy bu cür davranışlarla özünə normal məşqçi karyerası qurub, daim “vitrində” yer alır, futbolçular da ona oxşamağa niyə çalışmasın?!

Niyəsini indi sizə deyəcəyəm. “Turan Tovuz”la oyundan sonra Emin Mahmudovdan kubokun finalı ilə bağlı soruşublar. O da deyib ki, final qarşılaşmasına baxmayacaq. Guya küskündü. Bəlkə də final onun üçün maraqsız ola bilər. Lap elə heç də yorulmadığı mövsümün sonunda istirahətə də yollanar. Amma bunu bu cür nümayişkaranə şəkildə dilə gətirmək Azərbaycan futboluna hörmətsizlikdi. Sən millinin futbolçususan, futbol ictimaiyyəti arasında seçilənlərdənsən. Azarkeşlərdə kubokun finalına maraq yararmaqdansa, deyirsən ki, finala baxmayacam. Millinin kapitanı olmuş biri belə deyirsə, sıravi insanlar ölkə kubokunun finalına necə həvəs göstərsinlər?!

Bunun adı küskünlükdü. “Neftçi” finala çıxa bilməyib, Emin Mahmudov kubokdan küsüb. Eynilə bir vaxtlar Samir Abasov da belə etmişdi. “Neftçi”dən istefaya göndəriləndən sonra rayona yollanmışdı, deyirdi ki, orda odun doğrayır, qışa hazırlıq görür. Heç özünə əziyyət verib, Azərbaycan klublarının avrokuboklardakı qarşılaşmalarını da izləməmişdi. Bəlkə də, izləmişdi, amma acıq vermək üçün o cür deyirdi. Hər halda, Emin Mahmudovun da onun açdığı cığırla irəlilədiyi görünür.

Aşığın misraları da belə yerdə yada düşür. Obrazlı desək, Emin Mahmudov futboldan küsməyi Samir Abasovdan öyrənib.

AMAL