Bu mövsüm ''Kocaelispor'' 1-ci liqada çempion olmaqla superliqaya yüksəldisə, bu komandanın forvardı Oğulcan Çağlayan məhsuldarlığı ilə diqqət çəkdi.

29 yaşlı futbolçu ''Fatih Karagümrük''lü Uesli ilə birlikdə 1-ci liqanın bombardiri oldu. Oğulcan ilə bağlı önəmli transfer xəbərləri yayılıb.

Belə ki, bu hücumçu karyerasını İranda davam etdirə bilər. Ona həm İranın son çempionu ''Traktor'', həm də İsmayıl Kartalın çalışdırdığı ''Persepolis'' ciddi maraq göstərir. Qışda Oğulcan Səudiyyə Ərəbistanı klublarının da maraq dairəsinə düşmüşdü. Amma həmin vaxt danışıqlar bəhrə verməmişdi.

İran mətbuatında çıxan xəbərlərə görə İsmayıl Kartal özü şəxsən bu transferlə yaxından maraqlanır. Oğulcan daha öncə 2019/20-də ''Çaykur Rizəspor''da bu məşqçinin başçılığı altında oynayıb. Yəni onlar bir-birini yaxından tanıyır. Ancaq Çağlayanı transfer etmək istəyən klub ən azı 20 milyon lirə (təxminən 463 min avro) təzminat ödəməli olacaq. Çünki apreldə ''Kocaelispor'' superliqaya vəsiqəni təmin etdikdən sonra bu futbolçu ilə yeni müqavilə imzalanmışdı. Həmin vaxt sərbəstqalma maddəsi kimi müqaviləyə məhz bu məbləğ salınmışdı.

Daha öncə ''Qalatasaray''da da top qovmuş Oğulcan 2024/25-də 39 rəsmi oyuna 22 dəfə fərqlənərək karyerasının ən yaxşı mövsümünü keçirib. Qeyd edək ki, ''Persepolis''də artıq bir türkiyəli futbolçu - Sərdar Dursun çıxış edir.