Birillik uğursuz ''Barselona'' macərasının ardından ''Mançester Siti''yə qayıdan İlkay Gündoğandan maraqlı xəbər var.

Təcrübəli futbolçunun adı tez-tez ''Qalatasaray''la hallansa da, bu iddialar heç vaxt ciddi mərhələyə keçməyib. Amma indi vəziyyət dəyişə bilər.

Məsələ burasındadı ki, ''şəhərlilər'' yayda İlkayla vidalaşmağın əleyhinə deyil. Düzdü, təcrübəli futbolçu ilə ötən ay 2026-cı ilə qədər nəzərdə tutulan yeni müqavilə imzalanmışdı. Amma İngiltərə mətbuatının, konkret jurnalist Ben Yakobsun iddiasına görə İlkaya ciddi maraq göstərən klub olacağı təqdirdə ''Siti'' onun ayrılmasına mane olmayacaq. Yəni ingilislər təklifləri dəyərləndirməyə hazırdı. Özü də 34 yaşlı yarımmüdafiəçiyə görə böyük məbləğ tələb olunmayacaq. Zatən Gündoğanın indiki transfer dəyəri 7 milyon avro civarındadı. ''Siti'' onu simvolik bir məbləğə buraxmağa razı olacaq.

Bu xəbər ''Qalatasaray'' camiəsində hərəkətliliyə və həyəcana səbəb olub. Çünki İlkay ''Qalatasaray'' azarkeşi olduğunu və karyerasını bitirmədən öncə bu klubda forma geymək istədiyini bir neçə dəfə dilə gətirib. İndiki yaranmış vəziyyət isə İstanbul nəhəngi üçün göydəndüşmədi. İlkayın Türkiyəyə gəlməsi üçün bəlkə də ən ideal zaman məhz bu yaydı. Çünki o artıq ''Siti''yə verdiyini verib və yavaş-yavaş karyerasının qurub çağına qədəm qoyur. Amma İlkayın təcrübəsi ilə ''Qalatasaray''a verə biləcəyi çox şey var. Özü də ''sarı-qırmızılar'' gələn mövsüm ÇL-i də nəzərə almaqla çox iddialı bir heyət qurmaq istəyir.

Bütün bunları nəzərə aldıqda ''Qalatasaray''ın qarşıdakı günlərdə ''Mançester Siti''yə rəsmi təklif irəli sürməsi sürpriz olmayacaq.