Gündoğan Türkiyəyə niyə gəlib?
“Barselona”nın təcrübəli yarımmüdafiəçisi İlkay Gündoğanın Türkiyəyə gəlməsi söz-söhbətə səbəb olub.
Təcrübəli futbolçu “Barselona”nın verdiyi 3 günlük fasilədən istifadə edərək srağagün doğma məmləkətinə gəlib. “Qalatasaray”ın ona ciddi maraq göstərməsi barədə xəbərlər tez-tez Türkiyə mətbuatında peyda olur. Hava limanında dərhal türkiyəli həmkarlarımızın əhatəsinə düşən İlkay bunları deyib:
“Bir gün “Qalatasaray”da oynamağım mümkündü. Amma bu yay Türkiyəyə transfer mümkün görünmür. Bura, sadəcə, reklam çəkilişində iştirak etmək üçün gəlmişəm. Türkiyə futbolunu bacardığım qədər izləyirəm. “Fənərbaxça”nın bu həftə Çempionlar Liqasında oyunu oldu. İzləyə bilmədim, amma inşallah, cavab oyununda qalib gələrlər. Türkiyə AÇ-2024-də baxımlı futbol sərgilədi. Ən son ABŞ turnesində “Real”a qarşı oyundan sonra Arda Gülər ilə söhbət etdik. Türkiyə daha da irəli gedə bilərdi. Amma qismət deyilmiş. Karyeramı Türkiyədə bitirmək istərdimmi? Hələ ki indi olduğum yerdə çox xoşbəxtəm. Bunlar nəsib, qismət işidi. Hər şey ola bilər. Türkiyəni çox sevirəm. Anam da, atam da burda yaşayır. Nə olacağını bilmirəm. Arda Güləri sevirəm. Çox xarakterli futbolçudu. İnşallah, önü açıq olar və daha da yaxşı yerlərə gələr. Zatən “Real” kimi böyük klubda oynayır. Bir-birimizə qarşı oynayacağıq”.
Qeyd edək ki, “Barselona” ilə hələ “1+1” illik müqaviləsi olan 33 yaşlı futbolçu ötən mövsümü 51 oyun, 5 qol, 14 məhsuldar ötürmə göstəriciləri ilə tamamladı. Kataloniya nəhənginin yeni baş məşqçisi Hans-Diter Flik onun klubda qalmasının tərəfdarıdı. Amma rəhbərlik illik maaşının (12 milyon avro) yüksək olması üzündən Gündoğanın satılmasının əleyhinə deyil. Ona görə də “transfer pəncərəsi”nin sonuna qədər bu məsələdə hər an nəsə baş verə bilər.
Digər xəbərlər
