Son günlər “Real”ın baş məşqçisi Karlo Ançelotti ilə bağlı yayılan xəbər təsdiqini tapmayıb.

Football-plus.az xəbər verir ki, Braziliya mətbuatının iddiasına görə, tanınmış italiyalı mütəxəssislə Braziliya Futbol Konfederasiyası (BFK) arasında ilkin razılıq əldə olunmuşdu.

Şayiələrə görə 63 yaşlı mütəxəssis yayda Madrid nəhəngini tərk edərək BFK ilə 3 illik müqavilə imzalamalı və “pentakampeonlar”ın başına keçməli idi. Xəbərdə hətta qeyd olunurdu ki, Vinisius, Rodriqo və Militao kimi “Real”ın braziliyalı oyunçuları hadisələrin belə axarından böyük məmnunluq duyurlar. Amma dünən bəlli oldu ki, nə Ançelotti “Real”ı tərk etməyə, nə də BFK ona təklif irəli sürməyə hazırlaşır. Məşhur çalışdırıcı klublararsı dünya çempionatının finalından öncə keçirilən mətbuat konfransında bununla bağlı suala belə cavab verdi:

“Bu haqda heç nə eşitməmişəm. Mətbuatın nə nağıllar danışdığını bilmirəm. Bildiyim yalnız odu ki, mənim ”Real” ilə 2024-cü ilə qədər müqaviləm var və ayrılmaq fikrim yoxdu”.

Ançelottinin açıqlamalarından çox keçməmiş BFK də bu məsələ ilə bağlı rəsmi bəyanat yaydı. Bəyanatda Ançelotti ilə razılıq əldə olunması barədə xəbərlər tam təkzib olundu. Qeyd edək ki, namizədlər arasında “Roma”nın çalışdırıcısı Joze Mourinyo ilə “Fənərbaxça”nın baş məşqçisi Jorje Jezuşun da adı hallanır.