PFL "Şəfa" - "Şahdağ Qusar" matçıyla bağlı hansı tədbirləri görüb? - qurumun müdaxiləsinə ehtiyac yarandı
"Şəfa" bu gün 2-ci liqanın 24-cü turu çərçivəsində "Şahdağ Qusar"ı qəbul edəcək.
Bilindiyi kimi, meydan sahibləri qalib gəlsə, birinci pilləyə yüksələcək. Qonaqlar qələbə qazanacağı təqdirdə liderliyini möhkəmlədəcək.
Matçın prinsipiallığı öz yerində, paytaxt təmsilçisinin biletlərin qiymətini 10 manat təyin etməsindən və azarkeşləri üçün müvafiq ödənişi özlərinin etməsindən xəbərdarsız. Bununla belə, qusarlılar qarşı tərəfin onlar üçün yetərli sayda bilet ayırmadığını iddia edib.
Hər halda, artıq bütün biletlər satılıb. Böyük ehtimalla, oyunda 2-ci liqada mövsümün azarkeş rekordu qırılacaq. Qarşılaşmanın yetərincə gərgin keçəcəyini nəzərə alsaq, tribunalardakı durum mübarizə baxımından meydandakı vəziyyətdən fərqlənməyəcək.
Bəs PFL bu oyunla bağlı lazımi tədbirlər görübmü? Tərəflərin, xüsusilə "Şahdağ Qusar"ın "Şəfa"nın qayda pozuntusuna yol verməsiylə bağlı iddiaları araşdırılıbmı? Biletlərin qiymətiylə bağlı durum necə tənzimlənib?
"Football-plus.az"ın suallarını qurumun Texniki-İdman Şöbəsinin direktoru Elgiz Abbasov cavabladı:
"Matçın əhəmiyyətini dərk edirik. Peşəkar Futbol Liqası tərəfindən də müəyyən addımlar atılıb. Qarşılaşmanın "İdman" TV-də canlı yayınlanması nəzərdə tutulub. Həmçinin görüşlə bağlı qurumun operativ işçi qrupu yaradılıb. Onlar bütün təşkilati məsələlərlə bağlı meydan sahibi komandaya dəstək göstərəcəklər. Stadionda təftiş də aparılıb. Biletin qiymətinə gəlincə, bu haqda qərar kluba məxsusdu PFL bu məsələyə müdaxilə edə bilməz. Ona görə ki, klubdaxili məsələdi. Sadəcə, klub bileti rəqib tərəfdarlara öz azarkeşinə satdığı qiymətdən baha satmağı qadağan edir. Bu barədə qayda Əsasnamədə mövcuddu. Həmçinin stadionun azarkeş tutumunun 20 faizi rəqib üçün ayrılmalıdı. Bu mövzuyla bağlı qayda pozuntusuna yol verilməsi haqda bilgi alan kimi müdaxilə etmişik. İnanırıq ki, sabahkı oyunda əsl futbol ab-havası hökm sürəcək. Bu cür intriqanın, belə matçların olması 2-ci liqanın populyarlaşması və futbolun kütləviləşməsi baxımından çox vacibdi".
Xatırladaq ki, oyun bu gün 16.00-da "ASK Arena"da baş tutacaq.
KƏNAN BAHADIR
Digər xəbərlər
