Çempionlar Liqasında (ÇL) yarımfinalın ilk oyunlarından sonra həftənin ən yaxşı futbolçusu müəyyənləşib.

UEFA-nın saytının məlumatına görə, namizədlər PSJ-nin yarımmüdafiəçisi Vitinya və “İnter”in müdafiəçisi Denzel Dyumfris idi. ÇL-də həftənin ən yaxşı futbolçusu adına Dyumfris layiq bilinib. Niderlandlı futbolçu UEFA-nın saytında keçirilən sorğuda 1-ci yeri tutub.

Xatırladaq ki, Denzel “İnter”in səfərdə “Barselona” ilə 3:3 hesablı heç-heçə etdiyi oyunda iki qol vurmuş və bir məhsuldar ötürmə etmişdi. Onun bu mövsüm klubunda bütün turnirlərdə meydana çıxdığı 40 oyunda 10 qolun və 4 məhsuldar ötürmənin müəllifi olduğunu da qeyd edək.

ÇL-də həftənin rəmzi komandası da açıqlanıb. 11 nəfərlik heyətə PSJ 4, “İnter” və “Barselona” 3, “Arsenal”ın isə 1 futbolçusu layiq bilinib: qapıçı - Canluici Donnarumma (PSJ); müdafiəçilər - Denzel Dyumfris, Françesko Açerbi (hər ikisi “İnter”), Maylz Luis-Skelli (Arsenal), Markinyos (PSJ); yarımmüdafiəçilər – Nikolo Barella (İnter), Vitinya (PSJ), Pedri (Barselona); hücumçular – Lamin Yamal, Rafinya (hər ikis “Barselona”), Usman Dembele (PSJ).