Mövsümü yüksək səviyyədə keçirən bir çox ulduz forvardın yeni mövsümə hansı klubda başlayacağı bəlli deyil.

Söhbət ilk növbədə Viktor Dyokereş, Aleksander İsak və Viktor Osimhendən gedir. Bu futbolçuların hər biri Avropa nəhənglərinin hədəfindədi.

İsveçli Viktor Dyokereş bu mövsüm ''Sportinq''in heyətində Portuqaliya çempionatında 30 oyuna 38 qol, digər isveçli İsak ''Nyukasl''ın heyətində premyer-liqada 21 oyuna 22 qol, nigeriyalı Osimhen isə ''Qalatasaray''ın heyətində Türkiyə çempionatında 26 oyuna 22 qol vurub.

Bu arada İngiltərə mətbuatı süni intellekt sayəsində bu futbolçuların yeni klublarını müəyyənləşdirməyə çalışıb. Belə ki, süni intellektə hər üç oyunçunun gələn mövsüm hansı klubda başlayacağı ilə bağlı sual ünvanlanıb. İlk sual Dyokereşlə bağlı olub və süni intellekt bu futbolçunun yeni mövsümə ''Arsenal''da başlayacağını iddia edib:

Süni intellekt İsakın isə yayda ''Barselona''ya transfer olunacağını iddia edib. Halbuki bu futbolçuya ''Arsenal'' və ''Liverpul'' da ciddi maraq göstərir, üstəlik ''Nyukasl'' özü də hazırda ÇL zonasında qərarlaşıb.

Süni intellektin ən maraqlı təxmini isə Osimhenlə bağlı olub. Bu ''mənbəyə'' görə 26 yaşlı forvard yeni mövsümə ''Mançester Yunayted''də başlayacaq! Maraqlıdı ki, İngiltərədən gələn son xəbərlərə görə ''Yunayted''in tədricən Osimhenə marağı azalır. Çünki şayiələrə görə baş məşqçi Ruben Amorim Osimhenin yox, əvvəlki klubu ''Sportinq''dən gözəl tanıdığı Dyokereşin transfer olunmasını istəyir. Digər tərəfdən Osimhenin həmyerlisi, sabiq nigeriyalı futbolçu Con Obi Mikel də ortaya fərqli iddia atıb.

Onun sözlərinə görə Osimhen ''Çelsi''i fanatı olduğuna görə ''Yunayted''ə yox, məhz bu kluba keçməyə üstünlük verir.