Transfer dönəminə fəal başlayan “Beşiktaş” Qabriel Paulistanın ardından ikinci keçidini rəsmiləşdirib. İstanbul nəhəngi “Benfika” ilə müqavilə müddəti bitən və sərbəst oyunçuya çevrilən Rafa Silvanı heyətinə qatıb.

Əslində 31 yaşlı portuqaliyalı futbolçu “Qalatasaray”ın da ciddi maraq dairəsində idi. Hətta Joze Mourinyo “Fənərbaxça”nın başına keçəndən sonra həmyerlisi haqda danışarkən “eşitdiyimə görə, “Qalatasaray”la anlaşıb və ora yollanacaq” açıqlamasını vermişdi. Amma “Cim-Bom” təcrübəli oyuçu ilə maddi baxımdan anlaşa bilməyincə, o, “ağ-qaralar”a qismət oldu. Keçidin detallarına gəlincə, Silva ilə üçillik müqavilə imzalanıb. Onun illik qazancı 6 milyon avro təşkil edəcək. Bundan başqa, futbolçuya 10 milyon avro imza parası ödəniləcək. Yəni ümumilikdə 3 il ərzində Rafa Silva üçün klubun büdcəsindən 28 milyon avro çıxacaq! Qeyri-rəsmi məlumata görə, bu məbləğin yarısını Rafa Silva ilə şəxsən danışıqlar aparan və onu İstanbula gəlməyə razı salan yönətici Hüseyn Yücəl öz cibindən ödəyəcək. Həm vinger, həm oyun qurucusu, həm də mərkəz hücumçusu kimi oynamağı bacaran Rafa Silva daha öncə “Feyrense” və “Braqa”da top qovub. 2016-dan bəri şərəfini qoruduğu “Benfika”da isə o, fanatların sevimlisi sayılırdı.

Ötən mövsümü 52 rəsmi oyun, 22 qol, 15 məhsuldar ötürmə göstəriciləri ilə tamamlayan portuqaliyalı Lissabon nəhəngində üçü çempionluq olmaqla 7 titul qazandı və ümumilikdə 326 oyunda 94 qol, 79 məhsuldar ötürməlik diqqətçəkən performans sərgilədi. Rafa Silva illik 6 milyon avroluq maaşla “Beşiktaş” tarixinin ən çox qazanan futbolçusuna çevrilib. Əvvəlki rekord onun həmyerlisi Pepeyə məxsus idi. 2017-nin yayında “Qartal”a gələn və ilyarımdan sonra ayrılan təcrübəli müdafiəçinin illik qazancı 4,5 milyon avro idi. Hazırda Türkiyə çempionatında illik 6 milyon avro qazanan cəmi bir futbolçu var. Bu, “Qalatasaray”ın göz bəbəyi Mauro İkardidi. Yəni transfer dönəmi bitənə qədər bu göstərici yenilənməsə, Rafa Silva 2024/25-də Türkiyə çempionatında ən çox qazanan iki futbolçudan biri olacaq. Uçüncü pillədə isə 5 milyon avro qazanan “Fənərbaxça”lı Fred qərarlaşıb.

Türkiyə mətbuatının yazdığına inansaq, “Beşiktaş”ın növbəti hədəfi daha bir sabiq “Benfika”lı Anxel Di Mariyadı. Argentina ilə son mundialın qalibi olan və bu yay Lissabon nəhəngindən ayrılan ulduz futbolçu hazırda azad agent statusuna malikdi.