"Sumqayıt" Misli premyer-liqasının evdə keçirilən 32-ci tur matçında "Neftçi"ylə heç-heçə etdi - 2:2.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- Bəlkə də komandalar uzun müddətdi meydana belə qələbə əzmi ilə çıxmamışdı. Hər iki tərəf qalib gəlmək istəyirdi. Futbolçularıma təşəkkürüm edirəm. Hamısından razıyam. Səhvlərimizdən qollar buraxdıq. Amma oyundan, xüsusilə birinci hissədən çox razıyam. "Neftçi" çox yaxşı rəqibdi, güclü futbolçuları var. Növbəti matça hazırlaşacağıq. 

- Nə baş verdi ki, rəqib üstünlüyü ələ aldı?
- Kənardan elə görünə bilər. Fərdi səhvlər, "Neftçi"nin adı, oyunçularının ustalıq səviyyəsi futbolçularımda həyəcan yaradırdı. Belə komandaya qarşı belə oynadıqları üçün futbolçularıma alqış düşür.

- 1 xal qazandız, yoxsa 2 xal itirdiz?
- Qalib gələ bilmədiyimiz üçün məyusam...

- Karaişvilinin səhvinə görə qol buraxdız. Onu meydana buraxdığınıza görə özünüzü günahkar hiss edirsiz?
- Günahı mənim üstümə atmaq istəyirsizsə, problem yoxdu. Amma qalan komandaların baş məşqçilərinə də belə sual versəz, yaxşı olar. 

- Qapıda Xəyal Fərzullayevə şans verdiyinizə görə peşmansız?
- Xəyal Tovuzda qurtarışlar edəndə yaxşı qapıçı idi, indi 2 top buraxıb deyə pisdi? Gəncdi, ona güvənirəm. Ümidvaram ki, Xəyal növbəti oyunlarda da öz sözünü deyəcək.

- Mətbuatın sizə qarşı qərəzli olduğunu düşünürsüz?
- Xeyr. Əksinə, hər zaman dəstəyinizi istəmişəm. Bəzən haqqımda xoş olmayan ifadələri oxuyanda məyus oluram. Gənc məşqçi kimi komanda çətin vəziyyətdə olanda gəlmişəm. Amma təcrübəli məşqçilərə başqa suallar verilir... Belədə məcburam ki, bunu sizə deyim.

- Rövlan mövqeyinin ən yaxşılarındandı. Onu oynatmamağınızın səbəbi nədi?
- Biz 11 oyun qol vurmadıq. Həmin matçlarda Rövlan əsas heyətdə idi. Əvvəlki oyunlarda da start heyətində olub. Bir məhsuldar ötürməsi belə yox idi. Sərtan isə məhsuldar ötürmələr edir. Rövlan şansını gözləməlidi. Onu 10-15 dəqiqə oynatmaqdansa, cavan oyunçuya şans verərəm. Rövlanla problemimiz yoxdu. Məşqlərdə canla-başla çalışır. Növbəti oyunlarda onu meydanda görə bilərik.

KƏNAN BAHADIR