"Sumqayıt" Misli premyer-liqasının evdə keçirilən 19-cu tur matçında "Səbail"ə uduzdu - 0:2.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- Sonuncu pillədə qərarlaşan komandaya uduzduq. Normal haldı. Rəqib daha istəkli idi. Şanslardan yararlana bilmədik. "Səbail" isə fürsətləri maksimum dəyərləndirdi və qollar vurdu. Bəzi oyunçularımız təklif alıb. Qış "transfer pəncərəsi" bitmətikcə, belə məsələlər komandaya mənfi təsir edə bilər. Hər halda, oyunçularıma təşəkkür edirəm. Rəqibi qələbə münasibətilə təbrik edirəm.

- Hansı mövqelər üçün futbolçu axtarırsız?
- İki hücumameyilli oyunçu transfer edəcəyik.

- Bunun üçün gecikməmisiz?
- Sizinlə razıyam. Lakin bu, məndən asılı olmayan məsələdi. Əlimizdən gələni edirik ki, yaxşı futbolçularla anlaşaq. Bu gecə bir oyunçu Bakıda olacaq. Onu növbəti matçda meydana çıxması üçün hazırlamaq istəyirik.

- Rövlanın start heyətində olmaması təkliflərlə bağlıdı?
- Sərtan məşqlərdə daha fəal olur. Bu üzdən, ona şans verdim.

- Bəs, Səbuhi niyə start heyətində yox idi?
- Əzələsində yırtıq var. Təəssüf ki, onu ikinci hissədə meydana buraxmalı oldum. Heyətimiz geniş deyil, lakin gileylənməyəcəm. Futbolçularımla birgə yuxarı pillələr uğrunda mübarizə aparacağıq. Bir-birimizi başa düşməliyik. Mən hamını başa düşürəm. Bəziləri də komanda yoldaşlarının onlara görə çətinlik çəkdiyini anlamalıdı. Növbəti oyuna qədər bu problemi aradan qaldırmalıyıq.

KƏNAN BAHADIR