"Sumqayıt" Misli premyer-liqasının evdə keçirilən 25-ci tur matçında "Qarabağ"a uduzdu - 0:2.

"Football-plus.az" xəbər verir ki, "kimyaçılar"ın baş məşqçisi Vaqif Cavadov oyunsonrası mətbuat konfransında jurnalistlərin suallarını cavabladı.

- Azarkeşlərimizə təşəkkür edirəm. Yaxşı oyunun şahidi oldular. Deməyə çox söz yoxdu. Çalışmağa davam edirik. İnanıram ki, "Kəpəz"lə oyunda bunun bəhrəsini görəcəyik. Hər şey qaydasındadı. Sadəcə hələ də son nöqtəni qoya bilmirik. Bunun üzərində də çalışırıq.

- Artıq neçənci turdu ki, eyni sözləri eşidirik...
- Nə eşitmək istəyirsizsə, deyin, mən də ondan danışım. İmkanlar var, amma yararlana bilmirik. Belədə səbr etmək lazımdı. Problemlər "Kəpəz"lə oyunda öz həllini tapmalıdı. Bütün fikrimiz həmin matça yönəlib. Hələ ki komandanın "sükanı arxasında"yam. İnanıram ki, hər şey qaydasında olacaq.

- "Kəpəz"ə məğlub olsaz, istefa verəcəksiz?
- Hər şey ola bilər. Əlbəttə, biz qalib gəlməliyik. Bunu futbolçular da dərk edir. İndi də istefa verə bilərəm. Futbolçuların əzmkarlığı, intizamı, sərgilədikləri oyun onu deməyə əsas verir ki, komanda əlindən gələn hər şeyi edir. Ruhdan düşmürük. Daha çox işləmək lazımdı. Komandanın bu durumdan çıxması üçün əlimdən gələni edəcəm. 200 faiz əminəm ki, komanda premyer-liqada qalacaq.

- Nəyə əsasən bu qədər əmin danışırsız?
- Futbolçularıma güvənirəm. "Kəpəz"lə oyundan sonra hər şey normallaşacaq.

- Tutaq ki, "Kəpəz"ə qalib gəldiz. Bir qələbə nəyi dəyişəcək?
- Əsas həmin matçda qalib gəlməkdi. Məqsədimiz tilsimi qırmaqdı. Bunu bacarsaq, ardı gələ bilər. Qalan məsələlər haqda isə "Kəpəz"lə oyundan sonra danışarıq.

- Sanki küskün görünürsüz...
- Küskün olaram da. "Sumqayıt"a təzə gələndə deyirdilər ki, Vaqif komandanı çətin durumdan çıxardı. İndi deyirlər ki, Vaqif təcrübəsizdi. Başa düşürəm, normal şeylərdi. Yaxşı günlər də olacaq, pis günlər də. Məşqçi belə yetişir. Rəhbərlik sağ olsun ki, hələ ki, dözür. İnanıram ki, gələcəkdə daha yaxşı nəticələr qazana biləcəyim yönündə azarkeşlərimizə söz verə biləcəm.

KƏNAN BAHADIR