“Liverpul”a çempionluq üçün cəmi 1 xal lazımdı - İCMAL
Premyer-liqada 34-cü tur “Aston Villa” - “Mançester Siti” oyunu ilə start götürdü.
Sirr deyil ki, hər iki komanda Çempionlar Liqasına vəsiqə uğrunda mübarizə aparır. Gözlənildiyi kimi, oyun gərgin və dramatik mübarizə şəraitində keçdi. Birmingemlilər elə ilk hücumda hesabı aça bilərdi, ancaq Reşford topu dirəyə vurdu. “Şəhərlilər” isə ilk təhlükəli vəziyyəti Bernardo Silvanın sayəsində qola çevirdi. Düzdü, Qvardiolanın komandası hesabda üstünlüyü uzun müddət qoruya bilmədi. 18-ci dəqiqədə Reşford penaltidən vurduğu qolla tablodakı rəqəmləri eyniləşdirdi.
MS-nin oyunun əksər bölümündə ərazi üstünlüyünə malik olması təbii idi. Birmingemlilər isə xoşbəxtliyi əsasən əks-hücumlarda axtarırdılar. Onlar bəzən perspektivli hücumlar qursalar da, Orteqanın qapısı önündə real təhlükə yarada bilmirdilər. MS uzun müddət ərazi üstünlüyünü qola çevirməkdə çətinlik çəkdi. Ancaq lap sonda uğur onların yanında oldu.
Dokyunun əla asmasından sonra topu qapıdan keçirən Nunyeş “şəhərlilər”ə çox vacib qələbə qazandırdı. Qvardiolanın komandası ÇL-ə vəsiqə uğrunda mübarizədə əsas rəqiblərindən birini dramatik şəkildə məğlub etməklə 3-cü pilləyə yüksəldi. Düzdü, “Nottingem Forest”lə “Nyukasl” hələ 34-cü turun oyununu keçirməyib. “Aston Villa”nın çempionatda qələbə seriyası 5-də dayandı. Sözsüz, bu məğlubiyyət Emerinin komandasının ÇL yolunu çətinləşdirəcək, ancaq əsas rəqiblərlə xal fərqi elə də çox deyil. Maraqlıdı ki, həftəsonu MS və “Aston Villa” ölkə kubokunda yarımfinal oyunlarını keçirəcəklər. Onlar rəqiblərini sıradan çıxaracağı təqdirdə mövsümün sonunda bir daha “Uembli”də üz-üzə gələcəklər.
“Arsenal”ın son vaxtlar çempionatda xal itirməsi artıq adətə çevrilib. “Kristal Pelas”la oyun da istina olmadı. “Topçular” premyer-liqada keçirdiyi son 4 oyunda 3-cü dəfə xal itirdi. Hərçənd oyun Artetanın komandası üçün yaxşı başladı. Artıq 3-cü dəqiqədə Edeqorun cərimə zərbəsindən ötürməsini Kivyor uğurla tamamladı. Amma erkən qol qonaqları qətiyyən ruhdan salmadı. Onlar cəsarətlə və böyük qüvvə ilə irəli atılırdı. İlk yarının ortalarında Ezenin hesabı bərabərləşdirməsi oyunun axarına uyğun oldu. “Pelas” hissənin sonuna qədər irəli də çıxa bilərdi. Konkret Nketia sabiq komandasını məyus etmək baxımından gözəl şansı qaçırdı.
Qonaqlar ilk yarıda həm qapıya zərbələrin, həm də təhlükəli vəziyyətlərin sayı baxımından üstün idi. Bununla belə, fasiləyə az qalmış “Arsenal” Trossarın qolu ilə növbəti dəfə irəli çıxdı. “Topçular” 2-ci hissədə də ərazi üstünlüyünü əldən vermədi, sadəcə, Rayyanın qapısı önündə daha təhlükəli vəziyyətlər yaranırdı.
83-cü dəqiqədə “Kristal Pelas” haqq etdiyi bərabərlik qolunu vurdu. 81-ci dəqiqədə meydana çıxan Mateta cəmi iki dəqiqə sonra Salibanın kobud ötürmə səhvindən yararlandı. Çox baxımlı oyun göstərən Qlasnerin komandası “Emireyts”dən 1 xal aparmağa layiq idi. İndi “Kristal Pelas” “Aston Villa” ilə kubokun yarımfinal oyununa yaxşı əhval-ruhiyyədə hazırlaşacaq. “Arsenal” isə ÇL-də PSJ ilə oyuna hazırlaşmaq üçün bir həftə vaxt qazandı.
Əlbəttə, “topçular”ın növbəti xal itkisi “Liverpul”u sevindirdi. İndi bu komandaya çempionluğu rəsmiləşdirmək üçün “Tottenhem”lə cəmi 1 xal lazımdı.
34-cü tur
Mançester Siti – Aston Villa 2:1
B.Silva, 7. Nunyeş, 90+4 – Reşford, 18-p. (52192)
MS: Orteqa, Nunyeş, Diaş, Qvardiol, O’Rayli, Gündoğan, Kovaçiç, B.Silva, De Bruyne (Akanci, 90+6), Marmuş.
Arsenal – Kristal Pelas 2:2
Kivyor, 3. Trossar, 42 – Eze, 27. Mateta, 83. (60167)
Arsenal: Rayya, Timber, Saliba, Kivyor, Lüis-Skelli (Tirni, 86), Edeqor (Nvaneri, 86), Parti, Rays, Sterlinq (Saka, 60), Trossar, Martinelli.
Liverpul – 79, Arsenal – 67 (34), Mançester Siti – 61 (34), Nottingem Forest. – 60, Nyukasl – 59, Çelsi, Aston Villa – 57 (34), Bornmut – 49, Fulhem, Brayton – 48, Brentford – 46, Kristal Pelas – 45 (34), Everton, Mançester Yunayted, Vulverhempton – 38, Tottenhem – 37, Vest Hem – 36, İpsviç – 21, Lester – 18, Sauthempton - 11
Bombardirlər: Salah (Liverpul) - 27, Holann (MS), İsak (Nyukasl) – 21.
Faktlar
* Edeqor “Arsenal”ın heyətində “qol+ötürmə” göstəricisində Patrik Vieyranı arxada qoydu. 2021-ci ildən London klubunun formasını geyən norveçli yarımmüdafiəçi 33 qol və 29 ötürmə ilə 62 xal toplayıb. Onun fransalı həmkarı isə 61 xal toplamışdı.
* 83-cü dəqiqədə qol buraxmaqla qələbəni əldən verən “Arsenal” premyer-liqanın son 17 ildəki antirekordunu təkrarladı. Söhbət bir mövsümün gedişində komandanın irəlidə olduğu halda qələbəni əldən verdiyi oyunların sayından gedir. “Arsenal” 2024/25 mövsümündə artıq 9 dəfə belə halla üzləşib. Başqa komandalar maksimum 7 dəfə belə aqibət yaşayıb. Onu da xatırladaq ki, sonuncu dəfə “Tottenhem” 2007/08 mövsümündə oyunun gedişində qələbəni əldən verib.
Oyundan sonra
Xosep Qvardiola, MS-nin baş məşqçisi:
“Biz belə ssenariyə öyrəşməmişik! Son dəqiqələrdə qələbə qazanmaq “Liverpul”a xas özəllikdi. Buna öyrəşməmişik, ona görə də gerçəkdən xoşbəxtəm. Premyer-liqada son dörd oyunumuz qalıb, Avropanın ən yaxşı komandalarından biri olan “Aston Villa” ilə Çempionlar Liqasına vəsiqə qazanmaq uğrunda mübarizə apardığımızı bilirik. Çox yaxşı oynadıq. Təkbətək mübarizələrdə aqressiv idik. Həqiqətən razıyam. Futbol emosiyalar deməkdi. Son iki oyun çətin keçdi, çox razıyıq. Bu gün uduzmamağa çalışırdıq, ona görə ki, 1:1 pis nəticə deyil. Ancaq Dokyu möhtəşəm oyndı. Mövsüm bizim üçün uğursuz oldu. İngiltərə kubokunda finala çıxmağımız və ya Çempionlar Liqasına düşüb-düşməməyimiz bu mənada önəmli deyil. Bəzən uğursuz mövsümlər də olur”.
Mikel Arteta, “Arsenal”ın baş məşqçisi:
“Həm oyuna, həm də nəticəyə görə məyusam. Oyunda dominantlıq etmək üçün hərəkətlərimizdə sabitlik çatmadı. Bu da futbolun bir hissəsidi və bizə iki xal bahasına başa gəldi. Bu gün oyunun bir çox aspektində özümüzü daha yaxşı göstərməliydik. Bizə sabitlik lazımdı. Rəqib çox təşkilatlanmış oynadı, tərifi haqq etdi. Bundan dəfələrlə yaxşı oynamalıyıq. Səhvlər bizə baha başa gəlir. 6 gündən sonra mövsümdəki ən vacib oyunumuza (aprelin 29-da keçiriləcək PSJ ilə oyunu nəzərdə tutur – red.) çıxacağıq. Gücümüzü bərpa etməliyik”.
Digər xəbərlər
