“Nürnberq”in mərkəz hücumçusu Mahir Emrelinin bu klubda qalacağı, yoxsa özünə başqa iş yeri tapacağı hələ bilinmir. Amma Almaniya mətbuatına inansaq, onun xidmətində 2-ci bundesliqanın bir başqa klubu “Herta” da maraqlıdı. Yüzdəyüz əminik ki, Mahir bu dəyişikliyə gedərsə, böyük səhvə yol verəcək.

Yavaş-yavaş özünə gələn Emrelinin yenə də klubunu dəyişməsinin mənası nədi? Hazırda 44 xalla 8-ci pillədə qərarlaşan “Nürnberq” 3-cü yerdəki “Maqdeburq”dan cəmi beş xal geridədi. Berlin “Herta”sı isə 11-ci pillədədi. Son iki oyunda üç qol vuran millimizin hücumçusu elə “Nürnberq”də qalsa, yaxşıdı. Klozenin rəhbərlik etdiyi komanda 1-ci bundesliqaya çıxmasa belə, gələn il də şansını sınaya bilər. Baş məşqçi Miroslav Kloze də Mahir kimi mərkəz hücumçusu olub, Almaniya futbolunun əfsanələrindəndi. Mahir baş məşqçi, komanda yoldaşları və azarkeşlər ilə yola getsə, keyfiyyətcə yeni səviyyəyə yüksələ bilər.

27 yaşlı hücumçu bu mövsüm “Nürnberq”in heyətində meydana çıxdığı 20 çempionat oyununda 6 qol vurub. Bu nəticə ilə bombardirlər siyahısında 35-45-ci yerləri bölüşür. Postsovet məkanından həmin siyahıda gürcü Budu Zivzivadze də var.

MÜZƏFFƏR QULUZADƏ