Neymar Braziliya çempionatının 4-cü turunun “Santos” – “Atletiko Mineyro” (2:0) oyununun 34-cü dəqiqəsində əvəzləndi. Zədə alan məşhur hücumçu meydanı elektrokarda tərk etdi.

“Atletiko Mineyro” ilə oyun Neymar üçün xüsusi əhəmiyyət daşıyırdı. Axı “Santos”un 33 yaşlı hücumçusu vətənə dönəndən sonra ilk dəfə A seriyasının oyununda start heyətində yer almışdı. Ancaq bu oyun yeni məyusluq gətirdi – cəmi 34 dəqiqə oynaya bilən Neymar əvəzlənməsini xahiş etdi. O, sərbəst hərəkət edə bilmirdi, bu üzdən elektrokar meydana çıxmalı oldu. Futbolçu acığından ağlayırdı, bu anın videosu internetdə geniş yayılıb.

Həqiqətən də Neymarın məyus olması üçün əsas var – son ayyarımda sol budundan müalicə almış, yenicə lazaretdən ayrılmışdı. Məhz bu səbəbdən A seriyasında mövsümün startını boşa verib, Braziliya yığmasının martda Argentina və Kolumbiya ilə keçirdiyi seçmə oyunlarda görünməyib. ESPN-in yaydığı xəbərə görə, vinger sol budundakı zədəni yeniləyib.

“Santos” bu vəziyyətdə Neymara dəstək verib. Klubun sosial şəbəkə hesablarında belə paylaşım yer alıb: “Şahzadə! Bütün “Santos” ailəsi səninlədi”.
O da maraqlıdı ki, Neymar doğma “Santos”un heyətində evdə 100-cü oyuna çıxmışdı. Klub hətta bu əlamətdar günlə bağlı xüsusi futbolka hazırlamışdı. Göründüyü kimi, yubiley korlandı.
Neymarın futbola istədiyi kimi dönüşü heç cür alınmır. Son illərdə zədələr ulduz braziliyalıya əzab verir. O, “Santos”a 2025-in yanvarında dönüb, ancaq belə qısa müddət ərzində artıq orta ağırlıq dərəcəsinə malik ikinci zədəsini aldı.

Neymarın 2023-cü ilin avqustunda qoşulduğu “Əl-Hilal”da vəziyyət bundan da bərbad idi. Elə həmin ilin payızında xaçvari bağları qırılan hücumçu bir ildən artıq yaşıl meydandan kənarda qaldı. Braziliyalı Səudiyyə Ərəbistanı klubunda yalnız 7 oyun keçirməyə imkan tapdı.

Cari mövsümə gəlincə, Neymar “Santos”un heyətində bütün turnirlərdə 11 oyuna çıxıb və 3 qol vurub.