UEFA dünyadakı 3-cü ofisini İstanbulda açdı!
Avropanın ali futbol qurumu UEFA İstanbulda öz ofisini açmaq qərarına gəlib.
Dünən İstanbulun ''Çırağan Sarayı''nda açılış mərasiminə həsr olunmuş qala-gecə keçirilib. Tədbirdə UEFA prezidenti Aleksander Çeferin, qurumun idarə heyətinin üzvləri, Türkiyə Futbol Federasiyasının prezidenti İbrahim Hacıosmanoğlu, başqan vəkili Məcnun Odyakmaz, fəxri başqan Şenes Erzik, Türkiyə yığmasının baş məşqçisi Vinçentso Montella, ''Fənərbaxça'' və Klublar Birliyinin prezidenti Əli Koç, eləcə də başqa önəmli isimlər iştirak edib.
Qeyd edək ki, Nyonda yerləşən mənzil-qərargahı saymasaq, bu, UEFA-nın Brüssel və Londondan sonra dünyadakı üçüncü ofisi olacaq. Qurum bu ofis sayəsində həm də bu bölgədəki ölkələrlə də daha sıx əlaqə qurmağı planlaşdırır. Qala-gecədə açıqlamalar verən Çeferin bunları deyib:
''Türkiyə və İstanbula gəlmək mənə hər zaman müsbət emosiyalar bəxş edir. Öz tarixi ilə seçilən İstanbul həm də dünyada iki qitəni birləşdirən yeganə şəhərdi. Hər dəfə bura gələndə özümü evdəki kimi hiss edirəm. TFF və Türkiyə hökuməti hər zaman futbol tədbirlərini, yarışlarını ən yüksək səviyyədə keçirir. Dünyanın ən güclü klub turnirinin finalı 2023-cü ildə məhz İstanbulda uğurla keçdi. Qarşıdan da önəmli finallar gəlir. 2026-da Avropa Liqasının, 2027-də Konfrans Liqasının finalları da burda keçiriləcək. Ümid edirəm ki, bu iki finaldan heç olmasa, birində Türkiyə klubu da yer alacaq. TFF ilə əlaqələrimizi daha da gücləndirmək və təcrübələrimizi paylaşmaq istəyirik. Bu üzdən TFF ilə birlikdə ofis açmağa qərar verdik. Həm də AÇ-2032--yə Türkiyə ilə İtaliyanın birlikdə ev sahibliyi edəcəyini unutmayaq. Ona görə də Türkiyə ilə birlikdə hərəkət etmək bizim də maraqlarımıza uyğundu. Ümid edirəm ki, AÇ-nin finalında Türkiyə ilə İtaliya qarşılaşacaq''.
