Yunanıstan çempionatında çempionluq qrupunun 4-cü turu çərçivəsində AEK ''Olimpiakos''u qəbul edəcək. Qarşılaşma aprelin 27-də keçiriləcək.

''Football-plus.az'' xəbər verir ki, Yunanıstan Futbol Federasiyası bu önəmli matça türkiyəli hakim dəvət etmək qərarına gəlib.

Belə ki, Yunanıstan mətbuatının məlumatına görə oyunu Xəlil Umut Meler idarə edəcək. Bununla da Yunanıstan futbolunda bir ilk yaşanacaq. Düzdü, bu ölkədə əcnəbi hakimlərin xidmətindən tez-tez istifadə olunur. Amma Yunanıstan çempionatına indiyə qədər heç vaxt türkiyəli hakim təyinat almamışdı! Melerin köməkçiləri İbrahim Çağlar Uyarcan ilə Abdulla Bora Özkara olacaq. 4-cü hakim funksiyasını yunanıstanlı Tasos Papapetru icra edəcəksə, VAR hakimi də türkiyəli Onur Özütoprak olacaq.

Qeyd edək ki, ''Olimpiakos'' artıq çempionluğu rəsmiləşdirib. Oyun daha çox AEK üçün prinsipial əhəmiyyət kəsb edəcək. 3-cü pillədə qərarlaşan bu kollektiv 2-ci pillədəki ''Panatinaikos''dan 3 xal geridədi. 2-ci pillə ÇL-ə vəsiqə verir.

Xəlil Umut Meler hazırda Türkiyənin ən yaxşı hakimi sayılsa da, onun uğurlu mövsüm keçirdiyini söyləmək çətindi. Təcrübəli ədalət təmsilçisi xüsusilə Türkiyədən kənarda idarə etdiyi qarşılaşmalarda ümidləri doğrultmayıb. Dekabrda o, Səudiyyə Ərəbistanına dəvət alaraq ''Əl-Şabab'' - ''Əl-Hilal'' oyununu idarə etmişdi. Amma Meler matçı o qədər bərbad idarə etmişdi ki, Səudiyyə Ərəbistanı Hakimlər Komitəsinin sədri Manuel Navarro bu hakimin bir daha bu ölkəyə dəvət olunmayacağını bildirmişdi.

Fevralda ÇL-in pley-offu çərçivəsində keçirilən ''Brügge'' - ''Atalanta'' oyununda onun son saniyələrdə italyanların qapısına təyin etdiyi şübhəli penalti böyük müzakirələrə səbəb olmuşdu. Martın sonlarında isə türkiyəli hakim Millətlər Liqasının pley-offunda İrlandiya - Bolqarıstan matçının gedişində zədə alaraq digər hakimlə əvəzlənmişdi. Elə Türkiyə çempionatının özündə də həmişə olduğu kimi bu mövsüm də hakimlikdən ciddi narazılıqlar var.

Ümumiyyətlə, qardaş ölkədə hazırda hakimlik ideal səviyyədə deyil. Təsadüfi deyil ki, yayda 32 klubun iştirakı ilə keçiriləcək Klublararası Dünya Çempionatına heç bir türkiyəli hakim dəvət almayıb.