Xatırlayırsızsa, AFFA İcraiyyə Komitəsinin ötən ilin iyununda keçirilən iclasında ötən "futbol ili"nin sonunda Misli premyer-liqasını sonuncu pillədə başa vuran və 1-ci liqaya düşən "Qəbələ"yə akademiya və infrastrukturun saxlanılması məqsədilə bir il müddətinə 700 min manat maliyyə vəsaitinin ayrılması qərara alınmış, kluba dəstək üçün müxtəlif yaş qrupları üzrə yığmaların, həmçinin hakimlərin Qəbələdə təlim-məşq toplanışlarının keçirilməsi nəzərdə tutulmuşdu.

Aprelin 5-də saytımızda yer alan xəbərdə həmin məbləğin hələ kluba ödənilmədiyini yazmışdıq.

"Football-plus.az"ın əldə etdiyi məlumata görə, bugünlərdə AFFA "qırmızı-qaralar"a vəd etdiyi məbləğin 400 min manatını ödəyib. Qurumdan kluba bildirilib ki, qalan məbləğ də ən qısa müddətdə veriləcək.

Onu da qeyd edək ki, "Qəbələ" 1-ci liqanın 20-ci turunda "Baku Sportinq"in meydanından böyükhesablı qələbə (5:0) ilə ayrılıb və Misli premyer-liqasına vəsiqə qazanıb.

KƏNAN BAHADIR