Bilindiyi kimi, futzal yığmamızın qapıçısı Rövşən Hüseynli baş məşqçi Vitali Borisovun qərarıyla heyətdən kənarlaşdırılıb. Azərbaycan Futzal Federasiyasının yaydığı məlumata görə, buna oyunçunun intizamsız davranışı səbəb olub.

Görəsən, o, millimizin bu gün Avropa çempionatının əsas mərhələsi çərçivəsində Xorvatiyanı qəbul edəcəyi matçda iştirak edə bilərmi? Yoxsa, cəzası hər iki oyunu əhatə edir?

“Football-plus.az” xəbər verir ki, Rövşən yığmanın dünən keçirilən məşqində iştirak etməyib. Futzalçının bugünkü matçda iştirakı da gözlənilmir. Bəs, oyunçu hardadı? Qazaxıstan qayıdıb, ya millinin son matçından sonra dönəcək? Bu suallarla federasiyanın mətbuat xidmətinin rəhbəri Mahal Məmmədova müraciət etdik. O, saytımıza açıqlamasında bu haqda məlumatının olmadığını dedi. Bu arada Rövşən özü də suallarımızı cavablamaqdan yayınır.

Xatırladaq ki, Futzal Federasiyanın İcraiyyə Komitəsinin üzvü Mahmud Sadıqov Xorvatiyayla matçdan sonra Vitali Borisov və Rövşən Hüseynlinin iştirakıyla iclasın keçiriləcəyini, məsələ haqda ətraflı araşdırma aparıldıqdan sonra günahkar tərəfin cəzalandırılacağını bildirib.

Onu da bildirək ki, Rövşən intizamsız olduğu haqda iddialarla barışmır və günahsız olduğunu deyərək özünü müdafiə edir.

KƏNAN BAHADIR