Almanlar Mahiri mədh etdi - “Nürnberq” üçün həqiqətən vacib futbolçu olduğunu göstərdi”
2-ci bundesliqanın 29-cu turu Mahir Emreli üçün iki hadisə ilə əlamətdar oldu. Həmvətənimiz həm yanvarın 31-dən sonra ilk dəfə start heyətində meydana çıxdı, həm də 2025-ci ildə ilk qolunu vurdu.
Bəli, “Nürnberq”in şərəfini qoruyan futbolçu “Kayzerslautern”lə matçda fərqlənməklə komandasına 2:1 hesablı səfər qələbəsi qazandırdı. Bəs, Almaniya mətbuatı onun çıxışını necə qiymətləndirib?
“Football-plus.az” “Bild” və “Kicker” nəşrlərinin Mahirin performansıyla bağlı qeydlərini təqdim edir.
“Bild”:
“Nürnberq”in problemləri aradan qaldırmaq yönündə ixtisaslaşan futbolçusu növbəti dəfə möhtəşəm qol vurdu və manşetləri bəzədi. Azərbaycanlı oyunçu mükəmməl zərbəylə topu qapının yuxarı sağ küncünə göndərdi. Mahir reportyorumuza açıqlamasında qolu belə şərh etdi: “Həmin an hiss etdim ki, “çərçivə”ni nişan almalıyam. Tam zamanı idi”.
“Kicker”:
“Rəqibin hesabı bərabərləşdirmək üçün təzyiqi artırdığı vaxtda irəli atılan Mahir bütün cəsarətini toplayıb komandasının ikinci qolunu vurdu. 2-ci hissədə belə qollara nadir hallarda rast gəlinir. Adətən, belə epizodları dəyərləndirmək mümkün olmur. Amma cəsarətlə cərimə meydançasına daxil olan Emreli topu sol tərəfdən sağ küncə “sancmaqla” “Nürnberq” üçün həqiqətən vacib futbolçu olduğunu göstərdi”.
Bu arada “Kicker” 5 ballıq sistemlə Mahirə 2 xal verib. Böyük ehtimalla, buna onun matç ərzində yalnız bir zərbə ilə yadda qalması və 70-ci dəqiqədə sarı vərəqə alması səbəb olub. Maraq üçün qeyd edək ki, Mahirin 19 oyunda aldığı orta qiymət 3,5-ə bərabərdi.
KƏNAN BAHADIR
Digər xəbərlər
