Ötən mövsüm ''Seltik''in hegemoniyasına son qoyan ''Reyncers'' bu mövsüm çempionluq yarışında əzəli rəqibini çox irəli buraxıb. Amma əvəzində ''Reyncers'' avrokuboklarda uğurlu çıxışını davam etdirir.

Ən son ''Braqa'' ilə dueldən qalib ayrılan Qlazqo təmsilçisi Avropa Liqasında yarımfinala yüksəlib. ''Reyncers''in heyətində son illərdə bir futbolçu öz məhsuldarlığı ilə diqqət çəkir. Söhbət sağ cinah müdafiəçisi olmasına rəğmən qolların vurulmasında bir çox hücumçudan daha çox iştirak edən Ceyms Tavernyedən gedir.

İngiltərəli futbolçu ''Braqa'' ilə son qarşılaşmada ilk yarıda dubl etməklə diqqətləri üzərinə topladı. Bu mövsüm onun aktivində 48 rəsmi oyunda artıq 14 qol, 16 məhsuldar ötürmə var. Yəni Tavernye hələ davam edən bu mövsümdə 30 qolun vurulmasında yaxından iştirak edib! Müdafiəçi üçün sadəcə inanılmaz göstəricidi. Əslində 30 yaşlı bu oyunçunu faktiki olaraq 2015-ci ilə qədər heç kim tanımırdı.

''Nyukasl''ın yetirməsi olan və premyer-liqada cəmi 2 oyuna çıxan Tavernye uzun illər İngiltərənin aşağı liqa klublarında var-gəl edirdi. 2015-də ''Reyncers'' bu oyunçunu ''Viqan''dan cəmi 250 min funt sterlinq qarşılığında heyətinə qatdı. O vaxt klub hələ aşağı liqada idi və Tavernye də əfsanəyə çevriləcəyindən xəbərsiz idi. Bir il sonra ''Reyncers'' nəhayət elitaya vəsiqə qazandı və Tavernye də adından söz etdirməyə başladı. Komandada bütün standart zərbələri və penaltiləri o yerinə yetirir. Amma Tavernye oyun epizodlarından da qollar vurur.

Təkcə bir faktı vurğulayaq ki, 2015-dən bu yana, yəni son 7 mövsümdə bu futbolçu 185 (!) qolun vurulmasında yaxından iştirak edərək 79 qol, 106 məhsuldar ötürməlik inanılmaz performans sərgiləyib. Ən maraqlısı odu ki, hətta hücumçuların həsəd apara biləcəyi bu cür göstəricilərə baxmayaraq Tavernye bir dəfə də olsun İngiltərə yığmasına dəvət almayıb! Fanatların sevimlisi olan və kapitan sarğısını da daşıyan Tavernye şübhəsiz artıq indidən adını ''Reyncers''in tarixinə yazdırmağı bacarıb.

ƏLİ