De Bruyne gələcəyi ilə bağlı qərarını verdi
“Mançester Siti”nin aparıcı yarımmüdafiəçilərindən olan Kevin De Bruyne sürpriz qərarını açıqladı.
"Football-plus.az" xəbər verir ki, müasir futbolun ən güclü yarımmüdafiəçilərindən olan belçikalı ulduz mövsümün sonunda “Siti”dən ayrılacağını bildirdi. Bununla bağlı sosial şəbəkədə paylaşım edən De Bruyne bunları yazdı:
“Əziz Mançester, bu, mənim klubdakı son aylarım olacaq. Bu haqda yazmaq asan olmasa da, hər birimiz gec-tez belə bir günün gələcəyini bilirdik. Bu qərarı mənim özümdən eşitməyə layiqsiz. Futbol məni sizin yanınıza və bu şəhərə gətirdi. Mən bura arzularımın arxasınca gəlmişdim və həyatımın bütünlüklə dəyişəcəyini bilmirdim. Bu şəhər, bu insanlar, bu klub üçün hər şeyimi verdim və biz hər şey qazandıq! İstər-istəməz elə gün çatır ki, sağollaşmalı olursan. Ailəmlə birlikdə bu şəhərə, bu kluba və buranın insanlarına minnətdarıq. Mançester həmişəlik tək övladlarımızın pasportunda yox, həm də bizim ürəklərimizdə qalacaq. Bura hər zaman bizim evimiz olacaq. Gəlin, son anlarımızdan birlikdə zövq alaq”.
Bu yay 34 yaşı tamam olacaq De Bruyne “Siti”yə 2015-ci ildə 74 milyon avroya “Volfsburq”dan transfer olunmuşdu. Həmin vaxt bu, klub tarixinin rekord transferi idi. 10 il ərzində sözsüz ki, De Bruyne adını klub tarixinə yazdırdı. O, potensiallı futbolçudan dünya səviyyəli ulduza çevrildi və Mançesteri mümkün olan bütün titulları qazanmış futbolçu kimi tərk edir.
Belçikalı ulduz “Siti”də ümumilikdə keçirdiyi 413 rəsmi oyunda aktivinə 106 qol, 174 məhsuldar ötürmə yazıb. Eyni zamanda 6 premyer-liqa çempionluğu və 1 ÇL olmaqla 16 titul qazanıb. Son illərdə tez-tez zədələnən futbolçu bu mövsüm artıq əsas heyətdəki yerini də itirib. Onun ehtiyatda qalması artıq heç kimi təəccüblənidrmir. Məsələn, Çempionlar Liqasında “Real” ilə cavab oyununu De Bruyne əvvəldən sona qədər ehtiyatda keçirdi. Onun karyerasını MLS-də davam etdirəcəyi gözlənilir. Amma Səudiyyə Ərəbistanı klubları da təcrübəli ulduza ciddi maraq göstərməkdə davam edir.
Digər xəbərlər
