Beynəlxalq Olimpiya Komitəsinin (BOK) martın 20-də Yunanıstanda keçirilən 144-cü sessiyasında tarixi hadisə yaşanıb: qurumun 129 illik tarixində ilk dəfə qadın prezident seçilib.

Xatırladaq ki, BOK-un əvvəlki prezidenti, 2013-cü ildən bu vəzifəni daşıyan Tomas Bax ötən ilin avqustunda bir daha namizəd olmayacağını bildirmişdi.

Bəs onun iyunun 24-də səlahiyyətlərini təhvil verəcəyi yeni prezident kimdi?

41 yaşlı zimbabveli Kirsti Koventri üzgüçülük üzrə ikiqat olimpiya (Afina-2004, Pekin-2008), yeddiqat dünya çempionudu. O, BOK-un İcraiyyə Komitəsinin üzvü və idmançılar komissiyasının sədri idi. Zimbabveli xanımla yanaşı, Feysəl Əl-Hüsseyn (İordaniya), Morinari Vatanabe (Yaponiya), Sebastyan Kou, Yohan Eliaş (hər ikisi Böyük Britaniya), David Lappartyen (Fransa) və Xuan-Antonio Samaranç-kiçik (İspaniya) da prezident postuna iddialı idi. 97 mümkün səsdən 49-nu toplayan Koventri elə ilk mərhələdə seçilib.

Samaranç 28 səslə 2-ci, favorit sayılan Kou 8 səslə 3-cü olub. Koventri BOK-un tarixinə 10-cu və ilk afrikalı prezident kimi düşüb. İndiyə qədər Avropanın 8 və Amerikanın 1 təmsilçisi bu quruma rəhbərlik edib.