Beynəlxalq Olimpiya Komitəsinin (BOK) saytında bu qurumun prezidenti postuna namizədliyi təsdiqlənən 7 şəxsin ad-soyadı göstərilib.

Xatırladaq ki, Paris Olimpiadası başa çatandan sonra 2013-ün sentyabrından bəri prezident kürsüsündə əyləşən almaniyalı Tomas Bax tezliklə bu vəzifədən gedəcəyini açıqlayıb.

Prezidentliyə namizədlər
Bunlardan biri şahzadə Feysəl Əl-Hüseyndi. İordaniya kralı Abdalla ibn Hüseynin doğma qardaşı 2003-cü ildən ölkəsinin olimpiya komitəsinə rəhbərlik edir, həmçinin BOK-un İcraiyyə Komitəsinin üzvüdü. Vətənində Voleybol Federasiyasının idarəçiliyində də təmsil olunur. Amcaq iordaniyalının seçilmək perspektivi dumanlı görünür.

Sebastyan Kou Ümumdünya Yüngül Atletiko Assosiasiyasının başçısıdı. İngiltərəli ötənlərin məşhur atletidi: 1500 metr məsafəyə qaçışda ikiqat olimpiya çempionudu. Britaniyalı funksioner rusofob mövqeyi ilə tanınır, ötən il Rusiyadan olan atletlərin hətta neytral idmançı statusuyla da beynəlxalq turnirlərə qatılmasına icazə verməmişdi. Düzdü, onun BOK prezidenti postunu tutmaq şansını azaldan məqam var. Kou 2027-ci ildə “World Athletics”in rəhbəri vəzifəsini tərk edəcək, belədə BOK-da olmaq hüququnu da itirəcək. Ancaq Kou yenə də favoritlər siyahısındadı.

Kirsti Koventri 7 namizəd arasında yeganə qadındı. Onun seçilmək şansı yetərincə yüksək dəyərləndirilir: Kirsti əvvəllər BOK-un idmançılar komissiyasına başçılıq edib, bu vəzifədən 2021-ci ildə gedib. Xanım funsioner də ötənlərin titullu idmançısıdı – Olimpiada-2004 və Olimpiada-2008-də Zimbabve yığmasının heyətində 200 metr məsafəyə beliüstə üzmə yarışlarında qızıl medal qazanıb.

Yohan Eliaş Beynəlxalq Xizək İdmanı Növləri Federasiyasının fəaliyyətdə olan prezidentidi, 2021-ci ilin iyunundan bu vəzifəni daşıyır. Yohan hətta Səudiyyə Ərəbistanında da xizək yarışlarının keçirilməsini təklif edib. İsveçli biznesmen 2024-də BOK-un üzvü oldu.

David Lappartye 2017-ci ilin sentyabrından Beynəlxalq Velosipedçilər İttifaqına rəhbərlik edir, 2022-ci iin fevralından isə BOK üzvüdü. Buna qədər, yəni 2013-dən bəri Avropa Velosiped İttifaqının prezidenti postunu tutub. Lappartyenin namizədliyi üzərində Bax dayanır, ancaq fransalının seçilmək şansı o qədər də yüksək deyil.

Xuan Antonio Samaranç Baxın varisi olmaq uğrunda mübarizədə əsas favoritlərdən biridi. İspaniyalı 1980-ci ilin avqustundan 2001-ci ilin iyuluna qədər BOK-a rəhbərlik edən böyük Xuan Antonio Samarançın oğludu. Kiçik Samaranç 2001-ci ildən BOK üzvüdü.

Morinari Vatanabe 2018-ci ildə BOK üzvü oldu, 2017-ci ilin yanvarından isə Beynəlxalq Gimnastika Federasiyasının prezidenti, bu qurumun ilk asiyalı rəhbəridi. Yaponiyalı funksioner rusiyalı və belaruslu atletlərin hüquqları uğrunda mübarizə aparacağını demişdi. Ancaq Olimpiadaya yalnız rus batutçular yollandı. Bu ölkədən olan qalan gimnastlar neytral bayraq altında çıxış etməkdən boyun qaçırdı. Bir sözlə, Vatanabe ruslara simpatiyası olan adamdı.
Almaniyalı necə gedir?

Bax gələn il iyunun 25-də - mümkün 12 illik prezidentlik dönəmi başa çatandan sonra gedəcək. Belə düşünənlər var idi ki, almaniyalı məmur hakimiyyətini qorumaq üçün Olimpiya xartiyasını dəyişəcək, ancaq sabiq qılıncoynadan bütün şübhələri aradan qaldırdı. Bax BOK-un Parisdə keçirilən sessiyasında göz yaşı içində bunları dedi: “Bu qərarlarla sizlərin əksəriyyətini məyus etdiyimi bilirəm. Ancaq əmin edirəm ki, bu qərar sevimli olimpiya hərəkatımızın maraqlarına xidmət edir. Ona da əmin olmaq istəyirəm ki, yeni liderə hakimiyyət yumşaq yolla keçəcək. Bütün şərhlərinizi və dəlillərinizi yüksək dəyərləndirirəm. Ancaq geniş diskussiyalar və dərin düşünsələrin, eləcə də ailəmlə məsləhətləşmənin nəticəsində bu nəticəyə gəldim ki, Olimpiya xartiyasında nəzərdə tutulan maksimal müddətdən artıq səlahiyyət dövrümü uzatmağa dəyməz”.