Almaniya kubokunda bu həftə yarımfinal matçları keçirildi.

Avropada bəlkə də “nağılların” ən çox reallığa çevrildiyi turnir Almaniya kubokudu. Ötən il 2-ci bundesliqa təmsilçisi “Kayzerslautern” finala yüksəlmişdisə, bu dəfə 3-cü (!) bundesliqa təmsilçisi “Arminiya” bu uğuru yaşadı. Özü də Bilefeld klubu ardıcıl 4-cü (!!!) dəfə elita təmsilçisini mübarizədən kənarlaşdırdı.

Bu, nağıl deyilsə, bəs nədi?! Buna qədər “Union” (2:0), “Frayburq” (3:1) ve “Verder”in (2:1) “kitabını bağlayan” “Arminiya” “Bayer-04” ilə görüşdə aşkar autsayder kimi görünürdü. Turnirin son qalibi statusunda olan leverkuzenlilər hesabı açandan sonra meydan sahiblərinin durumu bir qədər də qəlizləşdi. Amma “Arminiya” hələ fasiləyə qədər hesabda önə keçərək fanatlarını sevincdən dəli olmaq həddinə çatdırdı.

Bu hesab sona qədər dəyişməyincə, “Arminiya” tarixində ilk dəfə kubokun finalına yüksəldi. İlk iki divizionda oynamadan finala yüksələn sonuncu kollektiv 2001-ci ildə “Union” olmuşdu. Buna qədər 3-cü liqa təmsilçisinin bir movsümdə elitanın 4 klubunu mübarizədən kənarlaşdırması faktına, ümumiyyətlə, rast gəlinməmişdi.

yarımfinal
Arminiya (D-3) – Bayer-04 2:1
Vörl, 20. Qrosser, 45+3 – Ta, 17.
Bayer-04: Qradetski, Frimponq, Mukiele, Ta, İnkapye, Qrimaldo, Andrix, Caka, Palasios (Bonifeys, 53), Adli (Tella, 77), Şik.

Ştutqart – Leyptsiq 3:1
Ştiller, 5. Voltmeyd, 57. Levelinq, 73 – Şeşko, 62.