Həftəiçi Almaniya kubokunda 1/8 final mərhələsinin oyunları keçirildi.

3-cü bundesliqa təmsilçisi “Arminiya” yaxşı mənada təəccübləndirməkdə davam edir. Ötən mərhələdə “Union”u mübarizədən kənarlaşdıran Bilefeld klubu bu dəfə elitanın daha bir təmsilçisi “Frayburq”dan üstün oldu. “Arminiya” adını ən güclü 8 klub sırasına yazdıran yeganə 3-cü bundesliqa təmsilçisidi. 2-ci bundesliqada çıxış edən “Karlsrue” də sürpriz etməyə yaxın idi. Amma bu komanda dramatik matçda penalti seriyasında “Auqsburq”a uduzdu. Səfərdə “Reqensburq”u darmadağın edən “Ştutqart”dan fərqli “Verder” 2-ci bundesliqa təmsilçisi “Darmştadt”la ev oyununda xeyli əziyyət çəkməli oldu və qələbə qolunu yalnız son saniyələrdə vurdu. 2-ci bundesliqanın iki iddialı klubunun - “Köln” ilə “Herta”nın dueli də dramatik alındı. “Keçilər” yalnız əlavə vaxtın son anlarında qazanılan penalti sayəsində mərhələni adladılar. Elita təmsilçilərinin duelində “Volfsburq” “Hoffenhaym”ı, “Leyptsiq” isə “Ayntraxt”ı darmadağın etdi. Son oyunun nəticəsini sürpriz saymaq olar. Çünki enişdə olan “Leyptsiq” son 6 rəsmi matçın 5-də məğlub olmuşdu. Əla formada olan “Ayntraxt” isə əksinə? 7 oyunluq qələbə, 9 oyunluq məğlubiyyətsiz seriya yaxalamışdı. Amma “öküzlər” rəqibə heç bir şans vermədilər.

Mərhələnin əsas dueli Münhendə baş tutdu. “Kor püşk” “Bavariya” ilə turnirin son qalibi “Bayer-04”ü artıq bu mərhələdə üz-üzə gəlməyə vadar etdi. Hər iki komanda meydana nominal hücumçusuz çıxmışdı. Meydan sahiblərində Keyn zədəli idisə, qonaqlarda Şik ehtiyatda qalmışdı. Oyunun əvvəllərinə Noyer damğa vurdu. O, 18-ci dəqiqədə irəli çıxaraq Frimponqu qabaqlamaq istəyərkən kobudluğa yol verdi və qarşısında tarixi bir qırmızı vərəqə gördü. Peşəkar karyerasında 18-ci mövsümünü və 924-cü rəsmi oyununu keçirən ünlü qapıçı ilk dəfə meydandan qovuldu! “Rekordmayster” azlıqda daha yaxşı təsir bağışlasa da, ilk yarıda qol olmadı. Xabi Alonso fasilədə Şiki meydana buraxsa da, çexiyalı forvard cəmi 15 dəqiqə sonra zədələnərək əvəzləndi. Məhz onun yerinə məcburiyyətdən meydana çıxan Tella isə matçın qəhrəmanı oldu. O, 69-cu dəqiqədə Qrimaldonun gözəl asmasını başla tamamladı.

Qalan vaxtda başqa qol olmayınca Münhen nəhəngi növbəti dəfə kubokda mübarizəni erkən dayandırmalı oldu. 2020-də bu turniri qazanandan sonra komanda sanki lənətlənib. Son 5 mövsümdə “Bavariya” kubokda 1/4 finaldan irəli gedə bilməyib! Alonso “Bayer-04”ün başında 5-ci rəsmi oyunda da “Bavariya”ya uduzmadı (3 qələbə, 2 heç-heçə). Bu, Almaniya futbolu üçün tarixi nəticədi. Buna qədər Almaniyada “Bavariya”ya qarşı ilk 5 oyunda məğlubiyyət acısı yaşamayan məşqçi olmamışdı. Əvvəlki rekord 1980-ci illərdə “Hamburq”un başında münhenlilərə qarşı ilk 4 oyunda uduzmayan əfsanəvi Ernst Happelə məxsus idi. Alonso həm də ölkə kubokunda məşçi kimi keçirdiyi 9-cu oyunda da məğlubiyyət acısı yaşamadı. XXI əsrdə yalnız Van Qal və Qvardiola bu göstəricidə hələ ki ondan üstündü. Hər iki məşqçi “Bavariya”nın başında olarkən kubokda ilk 10 oyunda uduzmamışdı. Onu da bildirək ki, “Bavariya”nı mübarizədən kənarlaşdırdıqdan sonra əsas favoritə çevrilən “Bayer-04” titulu qorumağı bacarsa, turnirin tarixində ardıcıl iki il qalib olan 8-ci fərqli komandaya çevriləcək.

1/8 final
Bavariya – Bayer-04 0:1
Tella, 69.
Bavariya: Noyer, Laymer (Boe, 73), Upamekano, Kim Min Ce (Tel, 84), Devis, Kimmix, Qoretska (Pavloviç, 73), Sane (Perets, 19), Olise, Koman (Qnabri, 73), Musiala.
Bayer-04: Kovarj, Mukiele (Artur, 61), Ta, Tapsoba, İnkapye, Caka, Andrix (Şik, 46/Tella, 61), Palasios, Frimponq, Qrimaldo, Virts.

Leyptsiq – Ayntraxt F 3:0
Şeşko, 31. Openda, 49; 58.
Leyptsiq: Vandevoort, Henrixs, Zayvald, Orban, Qeertruyda, Nusa (Klostermann, 84), Aydara (Şlager, 71), Vermeeren, Baumqartner, Şeşko (Silva, 76), Openda.
Ayntraxt: Trapp, Kollins (Knauff, 55), Tuta, Kox (Höylunn, 66), Kristensen, Skiri, Larsson (Çaibi, 46), Götse (Nkunku, 55), Braun (Mahmud Dahud, 82), Ekitike, Marmuş.

Arminiya (D-3) – Frayburq 3:1
Lannert, 28. Kania, 36-p. Oppi, 81 – Qreqoritş, 63.

Reqensburq (D-2) – Ştutqart 0:3
Miyo, 13. Çeys, 19. Voltemade, 61.

Verder – Darmştadt (D-2) 1:0
Yunq, 90+4.

Volfsburq – Hoffenhaym 3:0
Vavro, 63. Vind, 67. Gerhardt, 85.

Karlsrue (D-2) – Auqsburq 2:2, p. - 4:5
Şloysener, 54. Vanitsek, 111 – Essende, 40. Varqas, 120+3.

Köln (D-2) – Herta (D-2) 2:1, əlavə vaxtda
Niderlexner, 30-öz qapısına. Lyubiçiç, 120+1-p. – Matsa, 12-p.