"Biz penalti və VAR müdaxiləsini gözləyirdik" - AFFA Hakimlər Komitəsinin sədri
AFFA Hakimlər Komitəsinin sədri Frank De Blekere ölkə kubokunun yarımfinal mərhələsinin ilk oyunlarında qeydə alınan mübahisəli epizodları şərh edib.
"Football-plus.az" xəbər verir ki, o, “Araz-Naxçıvan” – “Qarabağ” görüşündə (1:0) Ağdam təmsilçisinin qapısına təyin olunan penaltini haqlı hesab edib.
“Araz-Naxçıvan”ın yerinə yetirdiyi künc zərbəsi zamanı top yaxın dirəyə tərəf ötürülür. Bu komandanın futbolçusu İssuf Paro sağ ayağı ilə topla oynayır. Onun arxasında olan Yassin Benzya topa toxunmadan “Araz-Naxçıvan”ın üzvünün sağ ayağına zərbə vurur. Baş hakim oyunu davam etdirir. VAR müdaxilə edərək, baş hakimi epizodu izləməyə dəvət edir. Təkrar görüntülərə baxdıqdan sonra hakim “Araz-Naxçıvan”ın lehinə penalti təyin edir. Hakimin penalti qərarı doğrudu", - belçikalı vurğulayıb.
Təcrübəli mütəxəssis “Neftçi” – “Sabah” (1:2) matçındakı penalti epizodunda da baş hakimin doğru qərar qəbul etdiyini söyləyib:
“Sabah”ın üzvü Tellur Mütəllimov cərimə meydançasında “Neftçi”nin oyunçusu Ağadadaş Salyanskinin ayağına arxadan zərbə endirdi. Hakimin penalti qərarını dəstəkləyirik".
Komitə sədri həmin matçda "Sabah"ın futbolçusu Coy-Lens Mikelsə qarşı aşkar kobudluğun olduğunu deyib:
“Sabah”ın hücumu zamanı top Coy-Lens Mikelsə çatır. O, cərimə meydançası daxilində qapı xəttinə doğru hərəkət edir və topa zərbə vurur. Hücumçu topu vurduqdan sonra “Neftçi”nin oyunçusu Yuri Matias gecikərək onun ayağına təmas edir. Hakim oyunu davam etdirir və “Sabah”ın xeyrinə künc zərbəsi təyin edir. Hücumçunun ayağına təmas aşkar şəkildə görünür. Buna görə də biz penalti və VAR müdaxiləsini gözləyirdik".
Digər xəbərlər
