A seriyasının 30-cu turunda ''Yuventus'' doğma fanatları önündə ''Cenoa''nı qəbul etdi.

''Football-plus.az'' xəbər verir ki, oyuna maraq böyük idi. Çünki Turin nəhəngi İqor Tudorun başçılığı altında debüt matçına çıxmışdı.

Qarşılaşma meydan sahibləri üçün çətin keçsə də, komanda yeni məşqçini qələbə ilə salamladı. Özü də ''Yuventus''a 3 xalı Kənan Yıldız qazandırdı. Gənc türkiyəli ulduz 25-ci dəqiqədə səhnəyə çıxaraq rəqib müdafiəsini tar-mar etdi və çətin vəziyyətdən topu tora göndərməyi bacardı. Oyunda başqa qol olmadı və ''Yuve'' minimal hesabla da olsa, çox dəyərli qələbə qazandı.

Düzdü, ''Bolonya'' da turu 3 xalla tamamladığından ''qoca sinyora'' 4-cü pilləyə yüksələ bilmədi. 19 yaşlı türkiyəli vinger ''Yuventus''un heyətində A seriyasında 56-cı oyunda 7-ci qolunu vurdu. Bu futbolçunun 20 yaşı mayın 4-də tamam olacaq.

Bununla da Kənan Yıldız İtaliya çempionatı 3 xallıq sistemlə oynanılmağa başlandığı 1994/95 mövsümündən bu yana ''Yuve''nin heyətində 20 yaşı tamam olmadan 7 qol həddinə çatan cəmi 2-ci futbolçu oldu! Daha öncə bunu Moyze Kin bacarmışdı. Yəni Kənan ad gününə qədər çempionatda daha bir qol vuracağı təqdirdə yeni rekordun sahibi olacaq.