"Səbr edin, görəcəksiz, Fransa bizə 11 qol vuracaq" - Mahir Şükürov dedi ha...
Novruz bayramı günlərində iki dəfə meydana çıxan millimiz yoldaşlıq oyunları çərçivəsində əvvəl Haitiyə, ardından Belarusa uduzmaqla şəkərburanı da burnumuzdan gətirdi, paxlavanı da.
Məlum məğlubiyyətlər fonunda yeganə ürəkaçan məqam baş məşqçi Fernando Santuşun Masazırda gənclərə start heyətində şans verməsi oldu.
Bəs, yığmamızın gələcəyi sayılan futbolçular nə ilə yadda qaldı? Onlar performansıyla növbəti matçlar üçün ümid vəd etdimi?
"Football-plus.az"ın suallarını yığmanın sabiq futbolçusu Mahir Şükürov cavabladı:
"Nə Haitiylə oyunda meydana çıxan heyəti bəyəndim, nə də Belarusla... Heç kim camaatı aldatmasın. Bizdə istedadlı gənc futbolçu yoxdu. Rəqib hələ Belarus idi, görün, başqası olsaydı, nələr baş verərdi... Biabırçı oyun! Səbr edin, görəcəksiz, Fransa bizə 11 qol vuracaq. Sonra deməyin ki, Mahir demədi!"
KƏNAN BAHADIR
