"Oyun baxımından nəzərəçarpan dəyişiklik görmədim. Hər iki komanda bizi rahatlıqla üstələdi. Həm Haiti, həm Belarus özünü Almaniya, Portuqaliya milliləri kimi apardı. Döyüşmürsənsə, cılız oyun göstərirsənsə, acizanə şəkildə uduzursansa, təcrübəli və ya gənc olmağının fərqi yoxdu. Komandada qələbə ruhu hiss edilmirsə, heyətdəki futbolçuların təcrübəli və ya təcrübəsiz olmasından danışmaq mənasızdı. Onlar uduzdu, biz də uduzmuşuq, bizdən əvvəlkilər də. Amma belə uduzmaq olmaz. Son iki oyunda ucuz məğlubiyyətlər yaşadıq. Əlbəttə, yeni oyunçulara şans verilməsinin tərəfdarıyam. Lakin bu yolla yox. Fernando Santuş gənc futbolçuları start heyətində meydana buraxdı, sonra təcrübəsiz olduqlarını deyib məğlubiyyətə bəraət qazandırdı. Yığmanın gələcəyi sayılan futbolçulardan qalxan kimi istifadə etdi. Həmin gənclər sərfəli nəticə təmin olunandan sonra meydana çıxmalı, ilk oyunlarında 10-15 dəqiqə oynamalıdılar. Ümumiyyətlə, belə məğlubiyyətlər bizə yaraşmır. Nə şans yaradırıq, nə əvəzetmələrdən sonra ritm dəyişir, nə də qol vura bilirik. Halbuki futbolçu milli formaya layiq olduğunu göstərmək üçün dağı yerindən oynatmalıdı".