Bundesliqanın son turunda Franfurt “Ayntraxt”ının səfərdə “Bohum”u 3:1 məğlub etdiyi qarşılaşmada Jan-Matteo Bahoya ilə bağlı iki maraqlı fakt qeydə alındı.

19 yaşlı fransalı vinger “Anje”nin yetirməsidi və “Ayntraxt”ın sıralarına 2024-ün yanvarında qoşulub. İstedadlı futbolçu yalnız fevralın sonlarından start heyətinə düşməyə başlayıb. “Bohum”la oyunun 12-ci dəqiqəsində “Vonovia Rurştadion”a toplaşanlar inanılmaz bir olayın şahidi oldu. Bahoya bir epizodda 37,16 km/saat sürətlə qaçdı. Bu, bundesliqa tarixinin yeni sürət rekordudu! Bahoya həm də bu turnirdə 37 km/saat sürət göstəricisinə çatan ilk futbolçu oldu.

Bahoyanın necə möhkəm qaçdığını təsəvvürünüzə gətirməyiniz üçün maraqlı bir xatırlatma edək. Useyn Bolt 2009-da 100 metrəni 9,58 saniyəyə qaçaraq hələ uzun illər qırılması çox çətin görünən tarixi rekorda imza atarkən onun bütün məsafə boyu orta sürəti 37,58 km/saat olmuşdu.

Maraqlıdı ki, bu, cari mövsümdə bundesliqa tarixinin sürət rekordunun qırıldığı artıq 4-cü haldı! Bu mövsümə qədər rekord Dortmund “Borussiya”sının üzvü Kərim Adeyemiyə məxsus idi. Bu futbolçu 2022/23 mövsümünün 19-cu turunda “Frayburq”la ev oyununda (5:1) komandasının 2-ci qolunu vurmamışdan öncə 36,65 km/saat sürət yığmışdı. Rekordlarla bol olan 2024/25-də isə ilk rekord 2-ci turda yeniləndi. “Haydenhaym”lı Sirlord Kontehin 2-ci turda “Auqsburq”la oyunda sürəti 36,67 km/saata çatdı. 9-cu turda “Ayntraxt”la səfər oyununda “Bohum”lu Gerrit Holtmann 36,74 km/saat sürətlə qaçaraq rekordu yenilədi. Amma bu rekord da cəmi 35 gün davam etdi. Özü də yenə Konteh fərqləndi. 13-cü turda “Haydenhaym” Münhendə “Bavariya”ya 2:4 uduzsa da, 28 yaşlı vinger bir epizodda 36,83 km/saat sürət yığmağa müvəffəq oldu. Amma göründüyü kimi, Bahoya bu göstəricilərin hamısını geridə qoydu.

Yeri gəlmişkən, Bahoya artıq yuxarıda qeyd etdiyimiz “Bohum”la oyunda 25-ci bundesliqa matçında ilk qolunu vurdu.

Bu qol sayəsində “Ayntraxt” da önəmli bir göstəriciyə nail oldu. Frankfurtluların ümumilikdə 293-cü fərqli futbolçusu bundesliqada qol sevinci yaşadı. Bununla da “Ayntraxt” turnirin tarixində ən çox futbolçusu qol vuran kluba çevrildi.