“Yaxşı nəticə əldə etmək üçün zəif nöqtələrimizi tapmalıyıq. Hər iki oyunda məşqçilər heyətinin zəif nöqtələrimizi görə bildiyini hesab edirəm. İlk oyunda daha öndə oynamağa çalışdıq. Haiti bizi asanlıqla əks-hücumlarda yaxalıyırdı. Bəlli bir vəziyyətlərdə qol imkanları yaratdıq. Qapımızda üç qol gördük. İkinci oyunda nisbətən geridən oynadıq. Geridən oynayanda qapımızda qol görmədik. Bir az irəli atılanda əks-hücumlarda yenidəm təhlükə yaranırdı. Elə səhvlər oldu ki, nəinki milli, heç klub səviyyəsində də bunlara yol vermək olmazdı. 16 yaşında belə səhvlər edə-edə öyrənməlisən. Əsas komandada çıxış edirsənsə, bu səhvlər yolverilməzdi. Bu iki oyun hansı istiqamətdə işləmək lazım olduğuna gətirib çıxardı. Haiti ilə Belarusu məğlub etsəydik belə, Ukrayna və Fransadan üstün deyilik. İslandiyanı məğlub etmək imkanımız ola bilər. Burda faciə də yoxdu. İndi top millilərlə oynamaq iqtidarında deyilik. Yalnız reytinqimizi yaxşılaşdırmağa çalışmalıyıq. Məğlubiyyətlər olacaq. Böyük hesabla məğlub olmamaq üçün yığcam müdafiə olunmalıyıq. Daha strukturlu oyun nümayiş etdirmək lazımdı. İkinci dəfədi Zamiq Əliyev mərkəz müdafiəçisi kimi səhvlərə yol verir. Mətbuat konfransında da Santuş onu qorudu. Camaat 20 yaşında dünya kubokuna sahib olur. Bəzi futbolçular var ki, onların performansı hələlik əsas milli üçün yetərli deyil. Renat Dadaşov da yaxşı futbolçu ola bilər. Amma əsas millidə oynayacaq xarakterdə deyil. Renat kimi oyunçuların nazı ilə oynamaq vaxt aparmaqdı. Bizim üçün hazırda xarakteri olan və başını topun qabağına qoya bilən futbolçular lazımdı”.

“Yığmanın Fernando Santuşun rəhbərliyi altında keçirdiyi oyunlardan İsveçlə Bakıdakı qarşılaşmanı qeyd etmək olar. Həmin oyunda məğlub olsaq da, rəqibə çoxlu problem yaratdıq. Amma zaman keçdikcə digər milli komandalarla oyunlarda sanki yığma öz oyununu itirir və nəticə qazanmaqda çətinlik yaşayır. Yığmanın son iki oyununa baxanda bizi seçmə mərhələdə acınacaqlı nəticələrin gözlədiyini deyə bilərik. Ukrayna və Fransa yığmalarının son oyunlarına baxdım, hər iki komanda hücumda həddən artıq hərəkətlidi, rəqib qapısı önündə çoxlu qol imkanı yaxalayır. Seçmə mərhələdə yığmamızı çətin oyunlar gözlədiyini indidən demək olar”.