“Millinin kapitanlığı Bədavi Hüseynovdan dərhal geri alınsın!” – “Göyqurdlar” bəyanat yaydı
Ölkəmizin futbol yığması dünən Millətlər Liqasının 4-cü turunda evdə Slovakiyaya uduzdu – 1:3.
Məğlubiyyət, təbii ki, həm stadiona təşrif buyuran, həm də matçı televiziya qarşısında izləyən futbolsevərləri üzdü. Bilindiyi kimi, yığmamız ML-də qələbəyə həsrətdi – 4 oyun, 4 məğlubiyyət! Komandanın əsas azarkeş qrupu “Göyqurdlar”ın matçdan əvvəl futbolçuları yanına çağırıb motivasiyaedici şüarlar səsləndirdiyini xəbər vermişik. Görünür, xoşagəlməz nəticə azarkeş qrupunu radikal qərarlar verməyə məcbur edə bilər.
“Football-plus.az” xəbər verir ki, bu barədə “Göyqurdlar”ın sosial şəbəkə hesabında bəyanat yayılıb:
“Bu torpaqlardan çıxmayan və dilimizi bilməyən birini millinin kapitanı etməkdə məqsədiniz nədi? Nəticə onsuz da yoxdu, nəticə olmayan yerdə belə hərəkətlər edərək yanan alovun üstünə benzin tökməyə qərar verirsizsə, o yanan alovda siz olacaqsız. Millinin kapitanlığı Bədavi Hüseynovdan dərhal geri alınsın! Bu ilk xəbərdarlığımızdı! Noyabrın 16-dakı matçda Bədavi Hüseynovu və ya başqa bir legioneri kapitan kimi görəcəyimiz təqdirdə “Qurultay”ı toplayaraq gələcəkdəki fəaliyyətimiz barədə qərar verəcəyik. Milli komanda sahibsiz deyil!”
Qeyd edək ki, “Göyqurdlar” paylaşıma AFFA-nı taq edib və bəyanatın Bədavi Hüseynova oxutdurulmasını tələb edib.
KƏNAN BAHADIR
Digər xəbərlər
