"Azərbaycan millisi Avropa komandasıdı" - Sebastien Miyne
Haiti millisinin baş məşqçisi Sebastien Miyne sabah millimizə qarşı keçirəcəkləri yoldaşlıq görüşü haqda danışıb.
"Football-plus.az" xəbər verir ki, mütəxəssis oyunöncəsi mətbuat konfransında bunları deyib:
"Sabahkı oyunda qələbə qazanmaq istəyirik. Bilirik ki, çətin olacaq, çünki rəqib çox yaxşı komandadı. Xüsusilə də öz vəziyyətimizi dəyərləndirmək üçün bu matç yaxşı sınaqdı. Qarşıda dünya çempionatının təsnifat mərhələsi və yayda keçiriləcək "Gold Cup" var. Komandaya meydana qələbə üçün çıxmağı aşılamışıq. İlk dəfə belə rəqibə qarşı oynayacayıq. Təlim-məşq toplanışının son oyunudu. Bu oyun bizim qarşıdakı seçimlərimizlə bağlı suallarımıza cavab olacaq".
O, yığmamızı təhlil etməyin çətin olmadığını bildirib:
"Yaxşı platforma və skautlarımız var. Analitika komandamız böyük olmasa da, rəqibi təhlil etmişik. Azərbaycan millisi Avropa komandasıdı. Ona görə də məlumat əldə etmək nisbətən rahatdı. Təhlil etmişik, yaxşı rəqibdi. Amma mən daha çox öz komandamın oyununu düşünürəm".
Migne heyətlə bağlı qərarlarından da danışıb:
"Müəyyən fikirlərim var. Hələ bir məşqimiz də olacaq. Həmin məşq bitdikdən sonra yekun heyətlə bağlı qərar verəcəm".
Baş məşqçi sonda ölkəmizə gələn futbolçuların arasında zədəlilərin olmadığını qeyd edib.
Digər xəbərlər
