"Araz-Naxçıvan" Misli premyer-liqasının 2-ci turunda öz meydanında "Şamaxı"ya qalib gəldi - 1:0.

"Football-plus.az" xəbər verir ki, Muxtar Respublika təmsilçisinin baş məşqçisi Elmar Baxşıyev matçdan sonra keçirilən mətbuat konfransında jurnalistlərin suallarını cavablandırıb:

- Maraqlı oyun alındı. Hər iki komanda hücum futboluna üstünlük verirdi. "Şamaxı" yeni komanda olsa da, bilirik ki, Ayxan Abbasov həmişə əzmkar kollektiv formalaşdırır. Ona görə də komandanı həftə ərzində ağır oyuna kökləyirdik. Futbolçular verilən tapşırıqları meydanda yerinə yetirməyə çalışırdı. Getdikcə daha yaxşı səviyyəyə qalxacağıq. Bu komanda yaxşı siqnallar verir. Futbolçularımı təbrik edirəm. İlk qələbəmizdi. İstədiyimiz yerə çatmaq üçün daha çox çalışmaq lazımdı.

- Futbolçularınız sanki yorğun görünürdü...
- Oyunun tempini futbolçularım qaldırıb-salırdı. Amma yorğunluq yox idi. Hələ ikinci turdu, komanda tam hazır ola bilməz. Təlim-məşq toplanışında iki oyun keçirmişik. Ümumi dördüncü matçımızdı. Getdikcə daha optimal formaya yaxınlaşacağıq.

- İlk turla müqayisədə qapıda dəyişiklik etdiniz. Bunun səbəbi nədi?
- Tərlanı ötən oyundakı səhvinə görə ehtiyatda saxlamadıq. Hər iki qapıçı "bir nömrə"di. İkisinə də şans verəcəyik.

- Çempionatda hədəfiniz nədi?
- Hədəf ikinci tura görə deyilmir. O hədəfi "Qarabağ" deyə bilər. Onlarda neçə illərin oturuşmuş heyəti var. Bizim kimi komandalar növbəti oyuna köklənir. Oynadıqca, qələbələr qazandıqca hədəfdən danışmaq mümkündü.