Mahir, sən artıq Klozeyə borclusan! – YAZI
“Nürnberq” martın 16-da 2-ci bundesliqanın 26-cı turu çərçivəsində “Qroyter Fürt”ü qəbul edəcək.
Bilindiyi kimi, Mahir Emreli Almaniyada ilk qolunu məhz bu rəqibin qapısına vurub. Deməli, həm də derbi xarakterli matç həmyerlimiz üçün gələcək uğurların açarı ola bilər. Ona görə ki, komanda səfərdə böyük hesabla məğlub etdiyi (4:0) rəqiblə indi “doğma divarlar” arasında qarşılaşacaq və bu matçda fərqlənməyə bəlkə də ən çox bizimkinin ehtiyacı var...
Təsadüfi deyil ki, “Nürnberq”in baş məşqçisi Miroslav Kloze də Mahiri məhz bu qarşılaşma üçün xüsusi hazırlayır. “Football-plus.az”ın məlumatına görə, mütəxəssis bunu “Bild”ə açıqlamasında etiraf edib:
“Fürt”lə oyunda gücümüzün 100 faizini sərf etməyə məcburuq. Bu üzdən Mahirin ötən həftə istirahət etməsinə icazə verdim. Emreli haqda həmişə müsbət düşünmüşəm. Son həftələrdə başverənlər fikirlərimi dəyişməyib. Onunla bağlı hələ də nikbinəm. Amma hələ oyuna bir neçə gün var. Hər şey Mahirin məşqlərdə göstərdiyi performansdan asılı olacaq”.
O başqa məsələ ki, oruc tutan Emrelinin bugünlərdə hansı ab-havada olduğunu demək çətindi. Hər halda, “Nürnberq”in əsas heyətində möhkəmlənmək üçün azı lazımi fiziki və pisoxoloji hazırlığa sahib olmalısan.
Meydana çıxdığı 22 matçda 11 qol, 3 məhsuldar ötürmə ilə yadda qalan, nəinki bu statistikada, intizam məsələlərinə görə də Mahiri üstələyən Stefanos Tziması ictimaiyyət önündə tənqid etməkdən çəkinməyən Miroslav Kloze hər şəyə - özbaşına düşərgəni tərk etməyinə, “Seul”la danışıqlara başlamağına, çox ciddi perspektivləri az qala pula dəyişməyinə, tez-tez sarı vərəqə almağına, məhsuldar hücumçu olmamağına, komandadaxili münaqişələrin mərkəzində yer almağına rəğmən, sənə inanırsa, özünü toparlamağa, sadəcə, məcbursan.
Məsələ artıq vəfa borcuna çevrilib, Mahir!
KƏNAN BAHADIR
Digər xəbərlər
