Çempionlar Liqasının 1/8 finalının ilk oyunu çərçivəsində ''Real'' ''Atletiko''nu qəbul etdi.

''Football-plus.az'' xəbər verir ki, Madrid derbisi çox maraqlı oyuna və baxımlı qollara səhnə oldu. Rodriqo artıq 4-cü dəqiqədə fərqlənməklə 2006-dan bu yana Madrid derbisində vurulan ən erkən qolun müəllifi oldu. Amma 32-ci dəqiqədə Xulian Alvares möhtəşəm qol ilə hesabı bərabərləşdirdi.

Argentinalı forvard fevralın 8-də La Liqa çərçivəsindəki oyunda da ''Santyaqo Bernabeu''da qol vurmuşdu. Alvares XXI əsrdə ''Bernabeu''da ardıcıl 2 rəsmi oyunda ''Real''a qol vuran ''Atletiko''nun 3-cü futbolçusu oldu. Daha öncə bunu 2010-da Dieqo Forlan və 2017-də Antuan Qrizmann bacarmışdı.

Vinisius və Mbappenin zəif təsir bağışladığı oyunda Braim Dias səhnəyə çıxdı. O, 55-ci dəqiqədə qələbə qolunu vurmaqla qəhrəmana çevrildi. Braim pley-offda ''Mançester Siti'' ilə səfər oyununda da çox vacib qol vurmuşdu. 25 yaşlı yarımmüdafiəçi qol sevincini fanatlarla qucaqlaşaraq qeyd etdiyi üçün sarı vərəqə ilə cəzalandırıldı.

Bundan başqa Diasın qolun ardından Dieqo Simeoneyə tərəf baxaraq emosional şəkildə ''danış, danış indi, dünən necə danışırdınsa indi də danış'' ifadəsini bağırdığı məlum olub. Bu xəbəri ''Movistar'' yayıb.

Qeyd edək ki, Braim Diasın start heyətində peyda olması Cud Bellingemin cəzalı olması sayəsində mümkün olub. Simeone oyunöncəsi mətbuat konfransında Diasın start heyətində oynayacağına inanmadığını bildirmişdi. Onun fikrincə, ''Real'' meydana daha müdafiəyəmeyilli heyətlə çıxacaqdı.