Tur “Frayburq”un “Verder”i “kötəkləməsi” ilə start götürdü. Əslində belə nəticəni gözləmək olardı. Çünki bir tərəf yüksəlişdə, digər tərəf enişdə idi. “Frayburq” ardıcıl 4-cü “quru”qələbəsini qazandı və nəhayət, çoxdan layiq olduğu 4-cü pilləyə yüksəldi!

"Football-plus.az" xəbər verir ki, “Volfsburq” evdə autsayder “Bohum”la bacara bilmədi. “Maynts-05” isə “Sankt Pauli” ilə ev matçında sürprizə imkan vermədi. Oktyabrdan bəri evdə uduzmayan “karnavalçılar” debütantı iki cavabsız qolla məğlub etdi.

Günün əsas sürprizi Münhenqladbaxda qeydə alındı. “Borussiya” evdə “Auqsburq” önündə darmadağın oldu. “Auqsburq” 2025-ci ildə bundesliqada keçirdiyi 5-ci səfər oyununda da uduzmadı (3 qələbə, 2 heç-heçə)! “Bayer-04” bu tur ciddi müqavimətlə üzləşmədi. Son çempion səfərdə “Holştayn”ın qapısına 2 cavabsız qol vurdu. Debütantın ilk dövrədəki qəhrəmanlığı təkrarlamağa gücü çatmadı. Həmin oyunda da Xabi Alonsonun komandası 2 topluq üstünlük yaxalamışdı. Amma “Holştayn” sonda 1 xal qazanmağı bacarmışdı.

Yeri gəlmişkən, Virts bu mövsüm bundesliqada 10-cu məhsuldar ötürməsini verdi. Ötən mövsüm isə o, 11 belə ötürmə vermişdi. “Böyük beşlik”də son iki mövsümün hər birində Virtsdən başqa məhsuldar ötürmə baxımından ikirəqəmli həddə çatan yeganə futbolçu “Liverpul”lu Salahdı. ÇL-dən fərqli daxili birincilikdə çox zəif təsir bağışlayan və son 6 turda cəmi 1 qələbəsi olan Dortmund “Borussiya”sı “Union”u meydandan silib-süpürdü. Oyun Girassi ilə Qrossun benefisinə çevrildi. Birinci hesabına 4 qol, ikinci isə 4 məhsuldar ötürmə yazdı! Amma “arılar” hələ də “ÇL zonası”ndan uzaqdı.

Tura bazar günü keçirilən üç qarşılaşma ilə yekun vuruldu. “Leyptsiq” Marko Roze ilə belə desək, əziyyət çəkməkdə davam edir. Son 6 turda cəmi 1 qələbəsi olan “öküzlər” bu dəfə iddiasız “Haydenhaym”la ev oyununda artıq ilk 13 dəqiqəyə 2 top buraxdılar. Halbuki “Haydenhaym”ın sentyabrdan bəri səfər qələbəsi yox idi. Düzdü, komandanın bu uğursuz seriyası yenə davam etdi. Çünki qalan müddətdə meydan sahibləri 2 qol vuraraq məğlubiyyətdən qurtulmağı bacardılar. Amma bu nəticəni onlar üçün uğur saymaq çətindi. “Leyptsiq” “ÇL zonası”ndan uzaqlaşaraq 6-cı pilləyə gerilədi. “Hoffenhaym”la “Ştutqart”ın oyununda qalib müəyyənləşmədi.

Turun mərkəzi oyununda “Bavariya” “Ayntraxt”ı qəbul etdi. Frankfurt təmsilçisi bundesliqada son 4 oyunun 3-də Münhen nəhəngindən xal almağı bacarmışdı. Elə bu dəfə də “qartallar”ın ən azı 1 xala iddia etməyə haqqı çatırdı. Komanda tura 3-cü pillədə daxil olmuşdu. Üstəlik Keyn də zədə üzündən start heyətində yox idi. Amma “Ayntraxt” güclü rəqibə yalnız bir hissə müqavimət göstərə bildi. Komanda fasilə ərəfəsində buraxdığı qoldan sonra psixoloji cəhətdən sındı.

“Rekordmayster” hətta Keynin qolları olmadan da rəqibi 4 dəfə mərkəzə dəvət etdi. İngiltərə yığmasının kapitanı 2-ci hissənin ortalarında meydana çıxsa da, heç bir qolda yaxından iştirak etmədi. Yeri gəlmişkən, qollardan birini hesabına yazan Hiroki İto “Bavariya”nın heyətində bundesliqada qol vuran ilk yaponiyalı futbolçu kimi tarixə düşdü! Beləliklə, “Bavariya” 23-cü turu da 8 xallıq fərqlə tamamlayaraq çempionluğa bir addım da yaxınlaşdı.

23-cü tur
Bavariya – Ayntraxt F 4:0
Olise, 45+2. İto, 61. Musiala, 83. Qnabri, 90+2. (75000)
Bavariya: Noyer, Laymer, Dayer, Kim Min Ce, İto (Devis, 63), Pavloviç, Kimmix (Qoretska, 43), Olise (Koman, 85), Musiala (Qnabri, 85), Sane, Müller (Keyn, 64).
Ayntraxt: Trapp, Kollins, Kristensen, Tuta, Teate, Knauff (Braun, 75), Larsson, Höylunn (Skiri, 46), Bahoya (Götse, 63), Can Uzun (Vahi, 46), Ekitike (Batşuayi, 75).

Holştayn – Bayеr-04 0:2
Şik, 9. Adli, 45. (15000)
Bayer-04: Kovarj, Frimponq (Mukiele, 83), Ta, Tapsoba, İnkapye, Qrimaldo, Caka, Andrix, Virts, Şik (Bonifeys, 83), Adli (Buendia, 70).

Borussiya D – Union 6:0
Leyte, 25-öz qapısına. Girassi, 40; 75; 80; 83. Bayer, 89. (81365)
Borussiya: Kobel, Ryuyerson (Kouto, 85), Əmrə Can, Şlotterbek, Bensebaini (Svensson, 70), Qross, Zabitser (Salih Özcan, 84), Adeyemi, Reyna (Çukvuemeka, 70), Bayer, Girassi (Gittens, 84).

Lеyptsiq – Haydenhaym 2:2
Openda, 45+2. Şeşko, 64-p. – Honsak, 6. Piringer, 13-p. (36619)
Leyptsiq: Qulaçi, Baku (Nedelkoviç, 80), V.Orban, Lukeba (Bitşiabu, 80), Raum, Zayvald, Kampl, Baumqartner (Vermeeren, 33), Simons, Openda, Şeşko.

Frayburq – Verder 5:0
Sildillia, 15. Qrifo, 33; 57. Doan, 76; 90+2. (34700)

Maynts-05 – Sankt Pauli 2:0
Li Ce Sun, 67. Nebel, 90+5. (33305)

Hoffеnhaym – Ştutqart 1:1
G.Orban, 74 – Voltemade, 9. (30150)

Borussiya M – Auqsburq 0:3
Klod-Moris, 55; 61; 70. (51493)

Volfsburq – Bohum 1:1
Svanberq, 81 – Maşoviç, 49. (23772)

1. Bavariya 23 18 4 1 69-19 58
2. Bayer-04 23 14 8 1 51-27 50
3. Ayntraxt F 23 12 6 5 49-33 42
4. Frayburq 23 12 3 8 34-36 39
5. Maynts-05 23 11 5 7 37-24 38
6. Leyptsiq 23 10 8 5 38-31 38
7. Ştutqart 23 10 6 7 41-34 36
8. Volfsburq 23 9 7 7 46-37 34
9. Borussiya M 23 10 4 9 35-35 34
10. Borussiya D 23 9 5 9 43-38 32
11. Auqsburq 23 8 7 8 27-35 31
12. Verder 23 8 6 9 35-47 30
13. Union 23 6 6 11 21-35 24
14. Hoffenhyaym 23 5 7 11 30-46 22
15. Sankt Pauli 23 6 3 14 18-27 21
16. Haydenhaym 23 4 3 16 27-47 15
17. Bohum 23 3 6 14 22-47 15
18. Holştayn 23 3 4 16 34-59 13

Bombardirlər: Keyn (Bavariya) – 21, Marmuş (Ayntraxt F), Şik (Bayer-04) – 15, Klayndinst (Borussiya M) – 14.

Turun rəqəmi
28 – “Bayer-04”ün başında bir neçə rekordun müəllifi olan Xabi Alonso bu dəfə adını bundesliqa tarixinə yazdırdı. Leverkuzen təmsilçisinin “Holştayn”la oyundan sonra bundesliqada səfərdə məğlubiyyətsiz seriyası 28 oyuna çatdı (20 qələbə, 8 heç-heçə). Bu, turnirin tarixinin yeni rekordudu! Əvvəlki rekord 1985-92-ci illərdə “Bavariya” və “Şalke-04” ilə səfərdə ardıcıl 27 qarşılaşmada uduzmayan əfsanəvi Udo Lattekə məxsus idi.

Turun ulduzu
Seru Girassi (Borussiya D) – yeni klubunda uyğunlaşmanı başa vuran qvineyalı forvard əla məhsuldarlıq sərgiləməyə başlayıb. O, son qarşılaşmalarda nadir hallarda meydanı qolsuz tərk edir. “Union”la görüşdə isə Girassi coşaraq poker etdi. Klub karyerasında ilk dəfə bir oyuna 4 qol vuran 28 yaşlı futbolçu bundesliqada ümumilikdə 70 oyunda 52 dəfə fərqlənib. Maraq üçün bildirək ki, buna qədər XXI əsrdə “Borussiya”nın heyətində bundesliqada poker etməyi yalnız iki futbolçu – Obameyanq və Holann bacarmışdı.

Turun sitatı
Tomas Müller, “Bavariya”nın forvardı: