Lamin Yamal bir neçə gün əvvəl doğma klubuna çox bağlı olduğunu növbəti dəfə dilə gətirib. Yeniyetmə istedad bu fikrini konkret qərarı ilə sübut edəcək.

"Football-plus.az" xəbər verir ki, 17 yaşlı hücumçu jurnalistin nə vaxtsa “Real”a keçə biləcəyi ilə bağlı sualının cavabında “bu, mümkün deyil. Yox, heç vaxt ola bilməz” deyib. Lamin bu yay “Barselona” ilə müqaviləsini yeniləyəcək.

“Mundo Deportivo” qəzetinin məlumatına görə, tərəflər arasındakı yeni müqavilənin müddəti 2030-cu ilə qədər olacaq. Futbolçunun meneceri Jorje Mendeş müqavilə ilə bağlı detalları müzakirə etmək üçün prezident Xuan Laporta və idman direktoru Deku Souza ilə görüşməyi planlaşdırır. Bu görüş Çempionlar Liqasının 1/8 finalının “Benfika” ilə ilk matçı ərəfəsinə təsadüf edəcək.

Yamal bu mövsüm bütün turnirlərdə 33 oyun keçirib, 11 qol vurub və 16 məhsuldar ötürmə verib. 17 yaşlı futbolşunun klubu ilə hazırkı müqaviləsinin müddəti 2026-cı ilin yayına qədər nəzərdə tutulub.