Droqba və Essyendən sonra daha bir sabiq ulduz Mourinyoya dəstək verdi
''Qalatasaray''ın Joze Mourinyonu irqçilikdə günahlandırmasının ardından portuqaliyalı məşqçiyə sabiq oyunçulardan dəstək gəlməkdə davam edir.
''Football-plus.az'' xəbər verir ki, ''Fənərbaxça''nın dünyaca ünlü çalışdırıcısı son derbinin ardından ''Qalatasaray''ın ehtiyat zonasında yer alanları hakimə çılğın etirazlarına görə meymuna bənzətmişdi. ''Cim-Bom'' isə bu məsələni TFF-yə, UEFA-ya və FİFA-ya daşıyacağını açıqlamışdı. Ötən gün Mourinyonun ''Çelsi''də sabiq oyunçuları - Didye Droqba ilə Mikael Essyen öz paylaşımları ilə ona dəstək vermişdilər.
Droqba yeri gəlmişkən, bir ara ''Qalatasaray''da da çıxış edib. Essyeni isə zatən bizim futbolsevərlər də gözəl tanıyır. Bu dəfə Mourinyonun ''Çelsi''dən daha bir sabiq futbolçusu - Con Obi Mikel ona dəstək verib. London nəhəngində ümumilikdə 11 mövsüm keçirən və karyerasını 2021-də - 34 yaşında bitirən nigeriyalı qatıldığı bir verilişdə bu mövzuya münasibət bildirərək bunları deyib:
''Joze Mourinyo hər zaman həqiqətləri söyləyir. Buna heç kim mane ola bilməz. Haqsızlıq görən kimi çəkinmədən bunu dərhal dilə gətirir. Bu üzdən bir çoxları onu bəyənmir. İndi də onu irqçi kimi göstərməyə çalışırlar. Bu, ciddi ola bilməz. Onun irqçilikdə günahlandırılması sadəcə gülməlidi''.
ƏLİ
Digər xəbərlər
