“Nürnberq”in futbolçusu Mahir Emrelinin Almaniya komandasını Koreya “Seul”una dəyişmək istədiyindən xəbərdarsız. Hətta futbolçu bu məqsədlə qarşı tərəflə danışıqlara başlasa da, klub hadisələrin axarına müdaxilə etdi və həmyerlimizi düşərgəyə qaytardı.

Məsələ ondan ibarətdi ki, Mahiri istəyən “Seul” oyunçuyla yox, “Nürnberq”lə danışıqlar aparmalı və almanların istədiyi məbləği ödəyəndən sonra futbolçunu heyətinə qatmalıdı.

“Football-plus.az” xəbər verir ki, “Bild” transfer prosesiylə bağlı yeni bilgi edib.

Almaniyalı həmkarlarımızın iddiasına görə, “Nürnberq”in qapısını döyən “Seul” klubun tələb etdiyi məbləği eşidəndə geri addım atıb. Söhbət 500 min avrodan gedir. Belədə Koreya təmsilçisi başqa variantlar üzərində dayanmağı daha məqsədəuyğun sayıb. O başqa məsələ ki, “Transfermarkt”da Emrelinin qiyməti 800 min avrodu.

Yenə də “Bild” “Seul”un Mahir üçün daha yaxşı təkliflə çıxış edə biləcəyini istisna etməyib. Xatırladaq ki, Koreyada qış “transfer pəncərəsi” martın 27-də bağlanacaq.

KƏNAN BAHADIR