Koreyanın superliqa təmsilçisi “Seul”un Mahir Emrelini transfer etmək niyyətində olduğunu yazmışdıq. Hətta həmyerlimiz bu üzdən “Nürnberq”in düşərgəsindən ayrılmış, komanda yoldaşlarından muştuluq almağı da ehmal etməmişdi. Böyük iş görürmüş kimi...

Hər halda, Almaniyanın 2-ci bundesliqa təmsilçisinin rəsmisi, dəqiq desək, idman direktoru Yoti Çatzialexiou əlini masaya möhkəm vurdu, yolculuğa hazırlaşan futbolçunu düşərgəyə qaytarandan sonra bildirdi ki, Mahir bizimdi və onu heyətində görmək istəyən klub əvvəlcə “Nürnberq”ə müraciət etməlidi.
Bəli, görünür, hiyləgər “Seul” “Nürnberq”ə təzminat ödəmək əvəzinə Mahirin gözlərini qamaşdıracaq maaş təklifiylə çıxış edərək oyunçunu “oğurlamaq” niyyətində imiş. Amma necə deyərlər, daş qayaya rast gəldi.

“Football-plus.az” “Bild”ə istinadla xəbər verir ki, indi “Seul” geriyə addım atıb. Koreya təmsilçisi “Nürnberq”in tələb etdiyi təzminatın məbləğini eşidəndə ağzı açıq qalıb. Bu üzdən Mahirin komandanı tərk etmək ehtimalı çox zəif görünür. Amma Koreyada “transfer pəncərəsi” martın 27-də bağlanacaq. O vaxta qədər “Seul” daha uyğun təkliflə “Nürnberq”in qapısını döyə bilər.

Bəlli və yetərincə ciddi olan məqamı isə unutmamalıyıq. Mahir “Nürnberq”də qalmaq istəmir. Cismi Almaniyada, ruhu Koreyadadı. Onu almanların düşərgəsinə qaytaran məqam yalnız müqavilə öhdəlikləridi.

KƏNAN BAHADIR