Dünən böyük maraqla gözlənilən İstanbul derbisi baş tutdu.

''Football-plus.az'' xəbər verir ki, qarşılaşmadan öncə yaşanan bir hadisə böyük təəccübə və müzakirələrə səbəb oldu. Çünki futbolda belə şeyə demək olar, rast gəlinməmişdi.

Adətən Türkiyə çempionatında oyunlardan öncə ölkənin himni səslənir və daha sonra futbolçular bir-bir əl verərək görüşürlər, eləcə də bir-birilərinə uğurlar arzulayırlar. Amma ''Qalatasaray''ın ''Fənərbaxça''nı qəbul etdiyi matçdan öncə himnin ardından belə demək mümkünsə, hər kəs dağılışdı. Futbolçular bir-birilərinə əl vermədilər və uğurlar arzulamadılar! Onların bu hərəkətinin səbəbi bəlli deyil.

Bundan başqa ikinci hissənin əvvəllərində ''Fənərbaxça''lıların yer aldığı tribunadan ''Qalatasaray''lıların yer aldığı tribunaya atılan fişəng üzündən oyun təxminən 2 dəqiqə dayandı. Xoşbəxtlikdən ciddi xəsarət alan olmadı. Amma İstanbul valisi Davut Gül stadionda və tribunada təhlükəsizlik qaydalarına riayət etməyən, fişəng yandırıb atan ümumilikdə 71 nəfərin kimliyinin müəyyən edildiyini, onların cinayət məsuliyyətinə cəlb olunacağını açıqlayıb.

Təssüf ki, bu dəfəki derbi məhz bu cür oyundankənar olaylarla yadda qaldı. 90 dəqiqənin özü isə maraqsız və qolsuz alındı. Tərəflər Türkiyə çempionatı çərçivəsində 136-cı dəfə üz-üzə gəldi və 45-ci bərabərlik qeydə alındı. Bu bərabərliklərdən 20-də hesab məhz 0:0 olub.

Türkiyə çempionatı tarixində ən çox qolsuz oyun məhz bu rəqabətdə qeydə alınıb! Qeyd edək ki, qələbə sayında ''Fənər''in üstünlüyü var (53:38).

ƏLİ