Türkiyə Futbol Federasiyası (TFF) böyük qalmaqallara səhnə olan və yarımçıq dayandırılan “Göztəpə” – “Altay” oyunu ilə bağlı tarixi sayıla biləcək qərar qəbul edib.

Xatırladaq ki, 1-ci liqanın 15-ci turu çərçivəsində noyabrın 27-də “Gürsəl Aksel” stadionunda keçirilən İzmir derbisinə hər iki klubun azarkeşlərinin xoş olmayan davranışı damğa vurmuşdu. Əvvəlcə qonaq tribunadan, yəni “Altay” azarkeşləri tərəfindən atılan fişəng “Göztəpə”nin 1-i ciddi olmaqla 3 fanatının xəsarət almasına səbəb olmuşdu. Oyunun dayandığı və fanatlara yardım etmək üçün tibbi yardım maşınının çağrıldığı anlarda isə bir “Göztəpə” fanatı tribunadan meydana tullanaraq künc bayrağının taxtası ilə “Altay”ın qapıçısı Ozan Evrim Özənçin başına sərt zərbələr endirmişdi. Bundan sonra hər iki komanda paltardəyişmə otağına yollanmış və hakimin qərarı ilə oyun yarımçıq dayandırılmışdı. Polis hadisə ilə bağlılığı olan 20 azarkeşi həbs etmişdi. Gözlənildiyi kimi, TFF olduqca sərt cəzalar verib. Belə ki, hər iki kluba texniki məğlubiyyət verilib! Bu, Türkiyənin peşəkar liqalarında qeydə alınan ilk belə haldı. Daha öncə 2017-ci ildə həvəskarlar liqasının “Uşakspor” – “Ödəmişspor” matçında hər iki kluba texniki məğlubiyyət verilmişdi. Amma peşəkar səviyyədə belə cəzaya rast gəlinməmişdi. TFF bu qərarı Futbol Müsabiqə Təlimatının “təhlükəsizlik səbəbi ilə matçların yarımçıq dayandırılması” başlıqlı 19-cu maddəsinə əsas qəbul edib. Həmin maddədə göstərilir ki, qurumun idarə heyətinin oyunun yarımçıq dayanmasına səbəb olan klublara texniki məğlubiyyət vermək hüququ var.

Bundan başqa, TFF-nin nəzdində fəaliyyət göstərən Nizam-İntizam Komitsəinin qərarı ilə “Göztəpə” növbəti 4, “Altay” isə 6 ev oyununu azarkeşsiz keçirmək məcburiyyətində qalacaq. Bu qərar “Altay” cəbhəsində narazılıqla qarşılanıb.