“Dnepr”in basketbolçusu, forvard Vladimir Konev Ukrayna gənclər yığmasının heyətində Avropa çempionatının seçmə turnirində iştirak etmək üçün Latviyaya yollanarkən qatardan düşürülüb.

"Football-plus.az"ın məlumatına görə, bu xəbəri mediaya klub prezidenti Valeri Kondratyev açıqlayıb.

Onun dediyinə görə, Konev və komandanın daha bir basketbolçusu Daniil Sipalo Latviyaya yollanarkən Ukrayna Gənclər və İdman Nazirliyinin icazəsinə malik olublar. Ancaq qeyri-müəyyən səbəbdən Konevi qatardan düşürərək vəziyyətin aydınlaşdırılması üçün Lutskdakı TSK-ya (ordunun komplektləşməsi ilə bağlı yaradılan qurum – red.) aparıblar. Kondratyev idmançının sərbəst qalması üçün idman naziri Matvey Bednıya və Ukrayna Milli Olimpiya Komitəsinin rəhbəri Vadim Qutsayta müraciət edib.

Bildiyiniz kimi, Rusiya 2022-ci ilin fevralından bəri Ukrayna ərazisini işğal etmək niyyəti ilə müharibəyə başlayıb.