“Real”la “Atletiko” sözləşibmiş kimi heç-heçə etdi. Belədə “Barselona”nın üzərinə düşən iş Madrid nəhənglərinin xal itkisindən yararlanmaq itdi. Flikin komandası bunu bacarmaqla zirvəyə şərik oldu. Maraqlıdı ki, avrokuboklara vəsiqəyə iddialılardan “Atletik”lə “Vilyarreal” da meydandan 1:1 hesablı heç-heçə ilə ayrıldı.

"Football-plus.az" xəbər verir ki, “Real” çempionatda ardıcıl 3-cü oyunda xal itirdi. Hərçənd oyunun əvvəli madridlilərin Pamplona səfərində hansısa çətinliklə üzləşəcəyindən xəbər vermirdi. Oyuna fəal başlayan qonaqlar dərhal təhlükəli vəziyyətlər yaratdı. Yalnız müdafiəyə fikir verən “Osasuna” 15-ci dəqiqədə qapısında qol gördü – Valverdenin ötürməsindən sonra Mbappe fərqləndi. Bu qol meydan sahiblərini silkələdi, oyun bərabərləşdi. İlk yarım saatın tamamında Oros az qala fərqlənəcəkdi, ancaq Kurtua “Real”ı xilas etdi.

Ardından, daha dəqiqi, 39-cu dəqiqədə hakimə hansısa arzuolunmaz söz deyən Bellingem (hakim onun “get ...” dediyini iddia edir, “Real” isə “açıl başımdan” ifadəsinin üzərində dayanır) birbaşa qırmızı vərəqə almaqla komandasını pis vəziyyətdə qoydu. Budimir fasilə ərəfəsində azlıqda qalan rəqibi cəzalandırmağa yaxın oldu. Hesab 58-ci dəqiqədə bərabərləşdi. Kamavinqanın Budimirə qarşı kobudluğuna görə referi Xose Munuera Montero “nöqtə”ni göstərdi. Zərərçəkən zərbəni dəqiq yerinə yetirdi.

Bundan sonra top mərkəzdə qalmadı. “Real” azlıqda da yetərincə təhlükəli hücumlar qurdu, Mbappe və Vinisius bir-birinin ardınca “Osasuna”nın müdafiəsinə problem yaratdı. Eyni zamanda, meydan sahiblərinin də perspektivli hücumları olurdu. Qonaqlar sonda qələbəyə yaxın idi, ancaq Modriç topu tirin üstündən vurdu, Mbappenin zərbəsini qapıçı qaytardı. Nəticədə komandalar meydandan 1 xalla ayrıldı. İdarəçilikdən kəskin narazı qalan “Real” Bellingemə görə apellyasiya şikayəti edib, amma hakimi təhqir etdiyi sübut olunsa, ingiltərəli futbolçu ən azı 4 oyunluq cəzalanacaq.

“Real”dan sonra meydana çıxan “Atletiko” həmşəhərlilərini zirvədən endirmək üçün əla imkan qazanmışdı. Bunun üçün sadəcə, “Selta”nı məğlub etmək lazım idi. Ancaq Simeonenin komandası imkandan yararlana bilmədi. “Atletiko” da “Real”ın taleyini yaşadı, yəni “hindular” artıq ilk yarıda azlıqda qaldı, fasilədən sonra isə penalti ilə cəzalandı. Sadəcə, “Atletiko” bütün oyunu azlıqda keçirdi. Artıq 5-ci dəqiqədə mərkəzdə topu itirəndən sonra Dürana qarşı hədsiz kobud oynayan Barrios meydandan qovuldu. Say üstünlüyü qazanan “Selta” topa nəzarəti ələ keçirsə də, rəqib müdafiəsinə problem yaşatmaqda çətinlik çəkirdi. Yalnız fasilə ərəfəsində qalisiyalılar fəallaşdı, onda da Düran yaxın məsafədən rəqib qapısına yol tapa bilmədi, Lopes topu tirin üstündən vurdu.

Qonaqlar 2-ci hissədə 4 müdafiəçili sxemə keçdilər, ancaq meydandakı mənzərə o qədər də dəyişmədi. Etibarlı müdafiə olunan “Atletiko” vaxtaşırı az qüvvə ilə hücuma da atılırdı. “Selta” qol istəyinə 68-ci dəqiqədə çatdı. Le Norman İqlesiasın ayağını tapdaladığına görə “hindular”ın qapısına penalti təyin olundu. Sonradan meydana çıxan Aspas viqoluları önə keçirdi. Ancaq bu qol qonaqlara qələbə qazandırmadı. Dieqo Simeone 78-ci dəqiqədə üçlü dəyişiklik reallaşdırmaqla komandasının oyununu gücləndirdi. Məhz oyuna sonradan qoşulanlardan biri – Sörlot cərimə meydançasının xətti üzərindən dəqiq zərbə vurmaqla hesabı bərabərləşdirdi. Qol meydan sahiblərini ümidləndirsə də, ədalət naminə “Selta”nın qələbəyə daha yaxın olduğunu deməliyik. Ancaq “Atletiko” 1 xalı qoruya bildi.

Turun başqa oyunlarına gəlincə, “Atletik” autsayderlərdən “Espanyol”la oyunda xal itirdi. Bilbaoluları 77-ci dəqiqədə məğlubiyyətdən Sanset qurtardı. “Vilyarreal” da “Valensiya”nı məğlub edə bilmədi. “Sarı sualtı qayıq” “yarasalar”ın 84-cü dəqiqədə vurduğu cavab qoluna üzüldü. Artıq 20-ci dəqiqədə azlıqda qalan “Real Sosyedad” “Betis”lə oyunda darmadağın oldu. “Jirona” evdə “Xetafe”yə uduzdu. Turun ən məhsuldar oyununda “Leqanes”lə “Alaves” bir-birinin qapısına üç dəfə yol tapdı. “Sevilya” isə qış fasiləsindən sonra nəticələrini yaxşılaşdırmaqdadı. Bu komanda hesabat turunda səfərdə aşkar autsayder “Valyadolid”i darmadağın etdi. “Malyorka” “Las Palmas”ı məğlub etməklə “avrokubok zonası”na yaxınlaşdı.

24-cü tur
Osasuna – Real 1:1
Budimir, 58-p. – Mbappe, 15. (22390)
Real: Kurtua, F.Qarsiya, Asensio, Çuameni, Valverde, Bellingem, Kamavinqa, Modriç, Dias (Rodriqo, 69), Vinisius, Mbappe.

Atletiko - Selta 1:1
Sörlot, 82 Aspas, 68-p. (64211)
Atletiko: Oblak, Qalan (Mandava, 59), Le Norman, Ximenes, M.Lyorente, Lino (Koke, 10), Simeone (Qallaher, 78), De Paul (Korrea, 78), Barrios, Qrizmann (Sörlot, 78), Alvares.
Barselona - Rayo Valyekano 1:0
Levandovski, 28-p. (45296)

Espanyol - Atletik 1:1
Fernandes, 62 Sanset, 77. (26645)

Vilyarreal - Valensiya 1:1
Geye, 32 Sadik, 84. (19701)

Betis - Real Sosyedad 3:0
Antoni, 51. Roka, 64; 69. (48758)

Jirona - Xetafe 1:2
Errera, 54 Uçe, 3. Mayoral, 62. (10354)

Leqanes - Alaves 3:3
Raba, 10-p.; 37-p. Munir, 88 K.Qarsiya, 25. Xordan, 50-p.; 68. (10681)

Valyadolid - Sevilya 0:4
Xuanlu, 5; 67. Romero, 45+1. Lukebakio, 84. (22123)

Malyorka - Las Palmas 3:1
Muriqi, 7; 28. Rodriges, 35 Bayçetiç, 62. (18475)

1. Barselona 24 16 3 5 65-25 51
2. Real 24 15 6 3 52-23 51
3. Atletiko 24 14 8 2 39-16 50
4. Atletik 24 12 9 3 37-21 45
5. Vilyarreal 24 11 8 5 47-35 41
6. Rayo Valyekano 24 9 8 7 27-25 35
7. Malyorka 24 10 4 10 23-30 34
8. Betis 24 8 8 8 30-31 32
9. Osasuna 24 7 11 6 29-33 32
10. Jirona 24 9 4 11 32-35 31
11. Real Sosyedad 24 9 4 11 20-23 31
12. Sevilya 24 8 7 9 29-34 31
13. Xetafe 24 7 9 8 20-18 30
14. Selta 24 8 5 11 35-38 29
15. Espanyol 24 6 6 12 23-36 24
16. Leqanes 24 5 9 10 22-35 24
17. Las Palmas 24 6 5 13 29-41 23
18. Valensiya 24 5 8 11 25-38 23
19. Alaves 24 5 7 12 28-38 22
20. Valyadolid 24 4 3 17 15-52 15

Bombardirlər: Levandovski (Barselona) – 20, Mbappe (Real) – 17, Rafinya (Barselona), Budimir (Osasuna) – 13.

Turun rəqəmi
25 – bütün turnirlərdə qol sayını 25-ə çatdıran Mbappe “Real”da Kriştiano Ronaldodan (2009/10) sonra debüt mövsümündə bunu bacaran ilk futbolçu oldu. Ronaldo (2002/03) və Van Nistelroy (2006/07) da ilk mövsümündə bu qədər qol vura bilmişdi.

Turun ulduzu
Vedat Muriqi (Malyorka) – 2022-ci ildən bu komandanın şərəfini qoruyan kosovolu hücumçu “Las Palmas” üzərindəki qələbənin memarı oldu. Cari mövsümdə artıq 6 qol vuran Vedat ötən mövsümdəki nəticəsini (7) yaxşılaşdırmağa çox yaxındı.

Turun sitatı
Toni Freyşa, “Barselona”nın sabiq direktoru:

Oyundan sonra
Dieqo Simeone, “Atletiko”nun baş məşqçisi:

Karlo Ançelotti, “Real”ın baş məşqçisi:

Faktlar
* Ardıcıl 4-cü oyunda “Real”ın qapısına penalti təyin olundu. “Leqanes”, “Atletiko” və “Mançester Siti” ilə oyunlarda da Madrid nəhəngi belə cəzalanmışdı. Bütün penaltilər qola çevrilib.
* “Real” 2020-ci ildən bəri ilk dəfə La Liqada ardıcıl 3-cü oyunda xal itirdi. Onda komandanı Zidan çalışdırırdı. Ançelottinin komandası “Osasuna” ilə heç-heçəyə qədər “Espanyol”a uduzub (0:1) və “Atletiko” ilə oyunda (1:1) 1 xal qazanıb.