La Liqada 19-cu turdan irəli çəkilən qarşılaşmada ''Real'' ''Atletik''in qonağı oldu.

Son dönəmlərdə qeyri-sabit təsir bağışlayan Karlo Ançelottinin komandası yenə fanatlarını üzdü. Bütün qollar ikinci hissəyə təsadüf etdi. Meydan sahiblərinin heyətində Aleks Berengerin qoluna qonaqlarda Cud Bellingem cavab versə də, Federiko Valverdenin kobud səhvindən sonra fərqlənən Qorka Quruseta ''Atletik''ə 2:1 hesablı qələbə qazandırdı.

Qolları sıralamaq üçün komandaya dəvət olunan Mbappe bu aralar penaltiləri qaçırmaqla məşğuldu. ''Liverpul'' ilə oyunda komandası 0:1 geridə olarkən penalti qaçıran fransalı ulduz bu dəfə ''Real''ın eyni durumunda yenə fürsəti boşa verdi. Madrid nəhəngi son 11-ci rəsmi oyunda 5-ci dəfə məğlub oldu (6 qələbə). Halbuki komanda bu seriyadan öncə keçirdiyi 73 rəsmi oyunda cəmi 4 dəfə uduzmuşdu (52 qələbə, 17 heç-heçə)!

Aktivində 33 xal olan ''Kral klubu'' lider ''Barselona''nı 4 xal irəli buraxdı. Amma ''Real'' bir oyun az keçirib. Onu da bildirək ki, ''Atletik'' bütün turnirlər nəzərə alınmaqla 2024-cü ilə həm ''Real'', həm də ''Barselona''nı məğlub etməyi bacaran yeganə komandadı.

ƏLİ