Bazar ertəsi AFFA İcraiyyə Komitəsi, demək olar ki hamının ikiəlli razı olduğu qərarı qəbul etməklə yaxşı iş gördü. Axır ki mütəxəssislərin və azarkeşlərin çoxdan arzuladığı, faydalı olacağını düşündüyü addım atıldı: növbəti mövsümdən premyer-liqada 12 komanda olacaq.

İndi əsas məsələ premyer-liqadan 1-ci liqaya yuvarlanacaq, 1-ci liqadan premyer-liqaya yüksələcək komandaların adına hansı yolla aydınlıq gələcəyidi. Bununla bağlı maraqlı variantlar ortaya atılıb. Bəziləri düşünür ki, mövsümün sonunda idman prinsipinə əməl olunmayacaq. Ən çox müzakirə edilən variant budu: 1-ci liqada mövsümü ilk iki pillədə bitirənlər premyer-liqaya yüksələcək, 3-cü yeri tutan elitanın sonuncusu ilə pley-off oyunu keçirəcək. İkinci və istənilən cəhətdən ən uyğun varian isə premyer-liqanın sonuncusunun 1-ci liqaya yuvarlanması, aşağı liqanı ilk “üçlük”də bitirənlərin elita klublarının sırasına qoşulmasıdı.

Hadisələrin mümkün axarı ilə bağlı AFFA rəhbərliyi tərəfindən ilk açıqlamalar verilib. Dəqiq desək, icraçı vitse-prezident Sərxan Hacıyev fevralın 4-də “CBC Sport”un “Bizim futbol” verilişində belə deyib:

Bəylər, söhbət hansı reallıqdan gedir ki, ortaya pley-off ehtimalı çıxır? Əksinə, futbolumuzun durumu pley-off mövzusunu, ümumiyyətlə, açmamağın lazım olduğunu göstərir. Heç kim deməsin ki, 1-ci liqada premyer-liqaya yüksələcək üç səviyyəli klub yoxdu. Buna ənənəvi “Moskva birdən qurulmayıb” ifadəsiylə də cavab vermək olar. Amma bəzi detalları mütləq qeyd etməliyik.

1-ci liqada “Qəbələ”, “İmişli” və “Karvan” kimi iddialılar var. Elə ilk “üçlük”də də həmin komandalar qərarlaşıb. Bu yaxınlarda “İmişli” öz hesabına stadionda təmir işləri gördü, ot örtüyünü dəyişdi. “Karvan”ın ən müasir tələblərə cavab verən yeni bazası fevralın sonlarında istifadəyə veriləcək. Yevlaxlılar bu ilin yayında ot örtüyü ilə bağlı da işlər görəcək. Hələ bu komandaların ciddi azarkeş kütləsinə sahib olduğunu da unutmamalıyıq. İmişli və Yevlax təmsilçilərinin premyer-liqaya gəlməsi minlərlə azarkeşin çempionata rəng qatması deməkdi. “Qəbələ” ilə bağlı ətraflı danışmağa ehtiyac varmı? Məncə, üç klubun varlığıyla bağlı razılığa gəldik. O başqa məsələ ki, bu komandalar sona qədər mövqeyini qorumalıdı.

İndi idman prinsipindən danışmağın vaxtıdı. Premyer-liqa təmsilçiləriylə 1-ci liqa iştirakçıları arasında səviyyə fərqindən hər kəs xəbərdardı. Bunun üçün uzağa getməyə ehtiyac yoxdu. Təkcə ölkə kubokunun cari mövsümündə keçirilən matçlara nəzər salmaq lazımdı. Həmin oyunlarda elita klublarının böyükhesablı qələbələr qazandığını bilirsiz. Ümumiyyətlə, 1-ci liqa komandasının premyer-liqa klubuyla belə gərgin mübarizədən qalib ayrılması üçün möcüzə, insanüstü qəhrəmanlıq lazımdı. Daha təcrübəli baş məşqçi və futbolçulara malik olan komandanın 1-ci liqa klubuna uduzması isə sadəcə, fiasko sayıla bilər.

Qısası, qalib əvvəldən bəlli olacaq. Belədə oyuna nə ehtiyac var? Bu, idman prinsipini pozmaq deyilsə, nədi? Özü də söhbət təkcə futbolun ruhunun qorunmasından yox, həm də kağız üzərində qeyd olunanlardan gedir: sonuncu pillədə qərarlaşan komanda premyer-liqanı tərk edəcək! Etməlidi! Bitdi! Bu qədər... Bunu hansısa reallıq dəyişdirməməlidi. Hacıyevin də dediyi kimi, rəqabəti qorumaq lazımdı. 2025/26 “futbol ili”ndə legioner limitinin “8+3” formatıyla tənzimlənəcəyini desə də qərarını heçə sayan İK üzvləri bu dəfə də Əsasnaməni tapdalayacaq?

KƏNAN BAHADIR