“Təbii ki, De Blekerenin açıqlaması bizi qane etmir” – Tovuzdan reaksiya
“Turan Tovuz”un Misli premyer-liqasının 22-ci turunda “Sabah”la matçdakı hakim qərarlarına etiraz etdiyini xəbər vermişdik.
Bölgə təmsilçisi matçdan sonra futbolçularına qarşı qayda pozuntularının olduğu anların videosunu yayıb. “Turan Tovuz” videonu bu açıqlama ilə şərh edib:
“Mövsüm ərzində artıq neçənci dəfədi hakim səhvləri ilə xal və ya xallardan məhrum oluruq. AFFA Hakimlər Komitəsinin sədri cənab Frank De Blekerenin “Sabah” – “Turan Tovuz” oyununda hakimliklə bağlı fikirlərini səbirsizliklə gözləyirik. Hər zaman qeyd etdiyimiz kimi, təmiz futbol, ədalətli qərarlar tələb edirik!"
Artıq Frank De Blekere “Sabah” – “Turan Tovuz” oyunundakı mübahisəli epizodları şərh edib: “58-ci dəqiqədə meydanın “Sabah”a aid hissəsində, künc bayrağının yanında top uğrunda mübarizə zamanı qayda pozuntusu baş verir, lakin hakim bunu qeydə almır və “Sabah”a (top meydanı yan xətdən tərk etdiyindən) yan xətdən oyunu bərpa etməyə işarə edir.
Oyun yenidən bərpa olunur (yeni hücümün başlama fazası) və “Sabah” hücumun sonunda qol vurur. Bu situasiyada VAR baş vermiş və hakim tərəfindən qeyd edilməyən qayda pozuntusuna müdaxilə edə bilməz. Yan xətdən bərpa “Sabah”ın yeni hücumunun başlanğıc mərhələsidi.
90+5-ci dəqiqədə VAR müdaxilə edir. Qayda pozuntusu baş verir (“Sabah”ın oyunçusu rəqibini itələyir). Qol vurulduqdan sonra VAR hücumun başlama fazasını yenidən yoxlayır və qoldan öncə baş verən qayda pozuntusuna müdaxilə edir. Hakim epizoda baxdıqdan sonra “Sabah”ın vurduğu qolu ləğv edir.
Hər iki halda VAR düzgün olaraq VAR protokoluna əməl etdi".
Siz bu qərarlarla razısızmı? Bu açıqlama sizi qane etdimi? Hələ də qaranlıq qalan məqamlar varmı? Bu sualları “Turan Tovuz”un idarə heyətinin sədr müavini, infrastruktur və maliyyə üzrə direktoru Əli Balakişiyevə ünvanladıq:
“Verdiyi qərarları biz də bilirik. 90+5-ci dəqiqədə olan izaha ehtiyac yox idi. Biz heç onu paylaşmamışdıq. Amma Jo Batistanın qolunun sayılmaması, qapımıza penalın verilməsi haqda heç bir izah yoxdu. Təbii ki, açıqlama bizi qane etmir”.
ƏSƏD SEYİDOV
Digər xəbərlər
